KPKT sedia mansik atur nikika gaji raban Bomba

SEREMBAN: O p i s Menteri Pengawa Berumah enggau Kaunsil Kandang Menua (KPKT) sedia mansik perambu nikika gaji raban Bomba enggau Penyah Penusah Malaysia (JBPM).

Menteri iya, Zuraida Kamaruddin madah kebuah pia laban pengawa JBPM diatu dipeda majak tusah lalu sama berat baka raban pengelikun bukai.

“Nyadi engka patut bisi penambah ba sukut pengelantang pendiau sida ke patut diperunding...(niki gaji) engka kitai deka berandau ngemasukka iya dalam bajet taun baru,” ku iya rambau Pengerami Hari Bomba Sedunya 2018 Renggat Nasional ba Padang Kaunsil Mengeri Seremban (MPS) ditu, kemari.

Kena Hari Tiga tu tadi, Zuraida diperita ngaga pemutus meri elaun khas RM200 sebulan ngagai genap pemesai enggau kaban JBPM lalu nya deka ditemu ujung bulan tu.

Elaun khas nya datai ari penemu ex- menteri Tan Sri Noh Omar kena 21 March tu tadi ti ngaku pengawa raban bomba enggau penyah penusah dalam napi penusah ngenyit, nya ti ngangatka sida setikas enggau ejensi pengelikun ke bukai.

Nyema dikemendar, elawin nya deka meri pemaik ngagai 14,761 raban pengereja JBPM, ke mungkur agih belanja urung RM35.4 juta setaun.

Berebak enggau nya, Zuraida madah opis menteri iya mega deka mansik sereta beratika baru pematut nambahka bajet raban bomba volunteer enggau komuniti dikena sida nyadi raban keterubah mantu JBPM maya bisi penusah ngenyit. — Bernama