Urung 1000 iku nyereta gempuru likun mantah RUU Kanun Tanah (Ubah) 2018
BINTULU: Urung 1000 iku pengempu tanah Adat Bansa Asal (NCR) di bagi menua tu udah ngatur gempuru likun pagi kemari kelai mantah pejalai Rang Undang-Undang Kanun Tanah (Ubah) 2018, ti udah dikemendar ba Aum Kunsil Nengeri (DUN) apin lama ke udah.
Pengawa mantah diatur di Dataran Esplanad Bintulu ditu udah digulu pengempu tanah NCR enggau Temuda, nyengkaum raban ari Gerempung Ukai Dikuasa Perintah ( NGO) Dayak, ti bisi di Bintulu.
Presiden Dayak National Congress (DNC), Paul Raja madahka pengawa ngemendarka Rang Undang-Undang Kanun Tanah nya diperatika iya ngemaruhka penuduk raban bansa Dayak di nengeri tu ti udah gawa negika tanah adat sida kenyau ari suba.
“Aku deka madah ditu, Rang Undang-Undang Kanun Tanah Sarawak (Ubah) 2018 ti dikumbai dikena ngaku Pemakai Menua eng- gau Pulau Galau (PMPG), dikena ngulihka hak ba tanah NCR di nengeri tu, puntan ngaku hak rayat ti bisi hak ngempu tanah sida,” ku iya, rambau aum pengarang berita pengudah tembu pengawa gempuru likun nya, pagi kemari.
Ku iya, pekara ti dikedeka peranak asal iya nya hak sida diaku nyadi pengempu tanah nadai ulih dikeruga orang bukai, iya nya ‘hak proprietary’ – ngempu tanah nya, lalu ukai nya ‘hak usufuktuari’ ti ngaku hak tauka pengelebih ti dipejalai tauka diasaika komuniti asal di menua diuwan sida, ngulihka asil tauka begiga ba tanah nya, tang enda tau ngempu tanah nya.
“Nengah pejalai undangundang tanah ke baru tu, tekalanya udah ngemunaska pengelebih hak enggau adat bansa Dayak ti udah ngaku PMPG, ti nyadi tanah adat ditampung ari aki inik sida, sebedau undang-undang tu bisi dipejalai, bakaka diatu,” ku iya nerang.
Ku iya, pengawa perintah ti natak PMPG tu udah ngasuh sida ti ngempu tanah ringat, laban pemesai tanah di sesebuah menua enda sama.
“Pekara ti ngasuh kitai irau diatu, baka ni nasit bala komuniti ti ngembuan PMPG lebih ari 1,000 hektar, enti sema pemesai bungkur tanah nya ditatak lalu nadai tau lebih ari nya, sereta baka ni nasit bala komuniti, diri sebilik endang ngembu tanah lebih ari 1,000 hektar?” ku iya asa.
Pekara ti nyata ku iya, bansa asal di bagi menua tu kelebih agi bansa Dayak mantah ubah tu laban pekara adat hak bansa asal di nengeri tu enda diperunding dikena mutarka isu PMPG tu, lalu pekara tu ngemunaska hak ba tanah nya.
“Berebak enggau nya, aku ngarapka Rang UndangUndang Kanun Tanah tu diserenih baru ngambika semua pengempu tanah nerima pemaik sereta pengelebih ari tanah sida tu, lalu ukai nya dimananipulasi, pulaika penguntung rabat berkepentingan aja,” ku iya.