Semua parti politik di Sarawak ulih begulai ari baruh GPS ungkup pengelikun rayat

SIBU: Semua parti politik ba nengeri Sarawak tau begulai ba perabung siti ari baruh Gabungan Parti Sarawak (GPS) dikena nentuka pengelikun rayat ba nengeri tu.

Siku raban Parti Rayat Sarawak ( PRS) ari Skim Gempuru Skuau, Tuai Rumah Labang Ayom madah, iya pechaya penumbuh parti baka Sarawak Workers Party ( SWP), Parti Reformasi Negeri Sarawak ( STAR), Parti Bansa Dayak Sarawak ( PBDS) Baru tauka Parti Rakyat Bersatu (UPP) deka mai pemaik sereta meri penegap ngagai GPS.

“Nyangka parti politik asal ari nengeri tu empu baka tu tau nambahka pemaik nyengkaum datai enggau penemu ti baru nyema begulai dalam GPS.

“Aku mega pechaya pekara tu tau ngaduka pengurang ti bisi ba GPS ke sebedau tu endang ari Barisan Nasional (BN),” pia ku iya nengah penerang media, kemari.

Labang mega sebedau tu kala nyadi siku ari raban SWP pampang Tamin.

Nambahka jaku iya, ku iya, ambika banding, baka SWP taja nadai pengari rayat tang parti nya mayuh raban serata nengeri.

“Ba Parlimen Selangau aja, SWP bisi 12,000 iku raban lalu ba serata nengeri bisi 30,860 iku raban.

“Ari tu kitai pechaya ukai semina datai enggau macham penemu tang baka SWP, raban sida deka ngeringka agi GPS,” ku iya madah baru.

Kelimpah ari SWP ti mayuh raban, Labang mega madah, parti-parti bukai bela ngembuan pengelebih enggau pengering diri empu.

“Ngarapka GPS ngerandang pintu ngagai parti endang asal ari Sarawak tu empu ngambika deka mujur agi ngelawa tuju lebih agi mai pengelantang pengidup ngagai rayat ditu,” pia ku iya madah.