‘ Tubai Pengerindu’ lagu baru ti deka ngerichahka industri muzik Iban
KUCHING: Penatai artis baru ngerichahka agi industri pemerindang di nengeri tu. Diatu udah majak mayuh komposer lagu enggau muzik ke landik sereta kreatif. Asil pengelandik seni ulih dibantai enggau nadai sekat tauka adan. Reti nya sapa pan ulih ngereja pengawa seni enggau chara lantang tauka ‘freedom’, pia ku Isa Lee lebuh iya dikerandau pengarang berita bekaul lagu baru iya ‘Tubai Pengerindu’.
‘ Tubai Pengerindu’ iya nya siti lagu ti betiun lundai ( balada) ke baru dua minggu udah pas sarap ari Radio Televisyen Malaysia (RTM). Naka ke diatu lagu nya udah dipasang ba stesyen radio Waifm Kuching enggau Catsfm. Udah tu lagu nya udah ulih dipasang tauka didinga ari Waifm Sri Aman, Sibu, Bintulu enggau Miri. Mensia mayuh ti rinduka lagu tu tau minta lagu nya ba program lagu peminta ari pengeluar program radio ngambika ngerichahka industri muzik Iban.
‘Tubai Pengerindu’ nya siti jerita pengidup; iya nya ba renggat keterubah bekunsi pengerindu ( love story). Pengerindu datai enda disadang pulai enda ulih tagang. Tubai (rachun pengerindu) tau ngasuh mabuk lalu ulih mega ngasuh mati. Baka nya mega pengerindu ti bendar nemu ngasuh mamau tauka sakit.
“Cherita lagu tu iya nya utai ke amat udah kala nyadi ba pengidup aku. Pengerindu nadai penanggul tau ngasuh lantang tang pengerindu ti bebelit ngasuh idup tusah. Mabuk pengerindu nadai sekat enggau adan; tuai biak sama ulih magang. Kenang lagu Tubai Pengerindu tau nyadika teladan laban nya ukai semina lagu pia aja tang iya ngajar reti pengelurus ati; enda bula sereta meras ati maya besulu,” ku Isa ke diatu benung kiruh nembuka album enam iku artis baru MK Smokehouse begulai enggau Ranyai Studio di Kuching.
Ku Isa lagu ‘Tubai Pengerindu’ deka dipasukka ba album kompilasyen begulai enggau artis bukai udah tu ila. Penerang ke silik pasal pekara nya bedau ulih dikunsika ditu.
“Aku meri besai terima kasih ngagai pemuzik Cami Ranyai, Amerio Evan, Oliver Christy OCHP, Pak Iran, Jimbun Tawai, Ranyai Studio, Harold Unsie ke udah suah nulung ba pengawa rekoding enggau ngelatika leka lagu. Terima kasih mega ngagai semua pengeluar program Waifm enggau Catsfm laban ulih masang lagu ‘ Tubai Pengerindu’. Terima kasih mega ngagai bala pangan ba media rama ‘Facebook’ ke selalu meri jaku peransang. Terima kasih semua”, ku Isa ngujungka saut iya.