Agih belanja pengari rayat PH di S’wak bepanggai ba pemeri perintah nengeri

MIRI: Peminta agih belanja di sitak pegai parti penyakal di nengeri tu bepanggai ba pemanah raban perintah nengeri.

Kaban Kunsil Nengeri ( ADUN) Pujut, Dr Ting Tiong Choon madah, nyadi pengari rayat Pakatan Harapan (PH) di Sarawak, iya semina ulih mantaika isu nya ngambi diperatika perintah nengeri.

“Aku ulih mai isu tu tang agih belanja bepanggai ba perintah nengeri,” ku Ting nerang ngagai pengarang berita kemari.

Ku Ting, PH di Sarawak mengkang nyadi penyakal taja PH nyadi parti megai perintah di renggat perintah besai.

Iya mega enda ulih masuk champur ba isu bekaul enggau perintah nengeri.

Taja pia, iya deka mantaika isu ngagai perintah besai senentang projek ti tau ngemai pemaik ekonomi enggau ngangkatka tikas idup peranak.

Antara iya, pengawa ngangkatmanahka Kaunsil Penyangkai Kapal Miri ti deka begunaka kerejasama rat perintah besai enggau perintah nengeri.

“Kitai nerang pekara ti patut digaga, bantaika is utu ngagai raban perintah besai sebedau sida berunding ngemendarka agih belanja,” ku iya nerang.

Ngelansa pasal pemutus kort meri pulai baru penuduk iya nyadi ADUN Pujut, ku Ting, iya deka naka ulih gawaka peranak Pujut enggau Miri.

Iya enggai ngachau (kes kort) deka nagang iya ari bejalai gawa dalam timpuh dua ngagai tiga taunt u sebedau Pengawa Bepilih Nengeri (PRN) ti diadang dalam taun 2021.

“Kitai dekaka peranak di Sarawak liat ati nganti dataika kitai ( PH) mujur nukar ketuai megai perintah nengeri tu (maya PRN),” ku iya nerang.

Ting meri terima kasih ngagai pengundi enggau penyukung ti nitihka kes kort iya.

Pemutus kort meri reti chukup besai laban udah ngulihka hak pengundi enggau rayat ti nyiri pengari rayat sida.