PBK enda besetuju Parti Pribumi Bersatu ngerembaika politik di Sarawak

SIBU: Parti Bumi Kenyalang (PBK) enda besetuju enggau penemu Parti Pribumi Bersatu ti bisi ati ngerembaika politik ba nengeri tu.

Presiden PBK, Yu Chin Liik madah, sida nangi penatai parti nya tau ngeruga penegap pengelikun ti ditanggamrayat Sarawak kenyau ari menya.

“Parti tu datai ari Semenanjung Malaysia nyangka bangat landik beambi ulih ari isu ke bisi nyadi ti tau bendar malut runding rayat ditu.

“Peda nama ke nyadi di Semenanjung Malaysia, sida din suah betalat enggau pangan diri ba isu ke bekaul enggau pengarap enggau bansa,” pia ku iya nengah penerang media ditu, kemari.

Yu madah, PBK nangi amat parti nya diberi awak numbuhka pati sida ba nengeri tu.

Ku iya, pengirau sida tu lebih agi bepun ari penemu politik orang Semenanjung Malaysia ti bebida enggau rayat ditu.

“Kitai meda sida kelalu agresif. Kitai enggai meda ulah baka nya malut rayat ditu ke endang udah lama dikelala idup likun ba penyerakup begulai enggau pangan diri enda ngira bansa enggau jalai pengarap,” ku iya madah baru.

Iya madah, di Sarawak udah chukup nama parti ke udah bisi ditu tang enda begunaka parti ari luar.

“Nadai orang bukai nemu enggau silik peminta enggau pengurang rayat nengeri tu.

“Nya alai, semina rayat Sarawak aja nemu sereta semina parti Sarawak aja engkeman ba Sarawak,” pia ku iya.

Berindik ari pekara nya, PBK ku iya, mantah amat penatai parti ari Semenanjung Malaysia nya tama ngagai nengeri Sarawak ti dipeda nadai mai penguntung ngagai rayat ditu.