Penatai pemisi Sarawak ari industri dagang temuai bisi nambah
KUCHING: Sarawak ngerikod penatai pemisi RM8.59 bilion ari industri dagang temuai ba taun 2017.
Menteri Dagang Temuai, Seni, Main Asal, Nembiak Lumba enggau Main Datuk Abdul Karim Rahman Hamzah madahka pemisi diulih pengudah Sarawak nerima 4.85 bilion iku orang dagang temuai ba taun nya.
Ku iya, penatai pemisi nya nambah ari taun ke udah ke alai penyampau orang dagang temuai nemuai ke Sarawak nambah 4.2 peratus enti dibanding enggau taun 2016.
“Lima menua ke pemadu mayuh nemuai ke Sarawak iya nya Brunei (1.73 juta iku temuai), Indonesia(513,442), Filipina (68,380), Singapura (42,177) enggau China ba penyampau 38,204 iku,”ku iya.
Karim mansutka jaku nya rambau nyimpul jurai aum ba Aum Dewan Kunsil Nengeri (DUN) Ke 18 di Komplek DUN ditu, kemari.
Iya nambah, ungkup timpuh bulan Januari nyentuk Mei 2018, penyampau penatai temuai manggai 1, 750, 640.
Ku iya, penyampau nya (2018) mandangka tebal agi temuai ke datai ari menua China enggau Singapura.
“Dalam timpuh bulan Januari enggau Mei 2018, temuai ke datai ari China manggai 19,641 iya nya nambah 20.22 peratus enti dibanding ba timpuh ke sama ba 2017,” ku iya.
Karim pechaya peratus nya nambah ketegal servis penerebai bilun terus ke Shenzhen berengkah bulan Disember 2017.
Ungkup Singapura ku iya, penyampau temuai ke datai mega nambah 15.80 peratus dalam timpuh ke sama iya nya 17,856 iku.
Bepelasarka rikod dalam timpuh lima bulan keterubah nya, Karim nagit Sarawak ngerikod 4.5 bilion iku temuai ba 2018 lalu nyadang ngerikod penatai pemisi RM8.05 bilion.
Ngenang kaul ke sama, iya madah Sarawak bulih RM439,731ari asil chukai dagang temuai dalam timpuh bulan September 2017 nyentuk Disember 2017.
Perintah Sarawak ku iya diberi 50 peratus tauka RM5 ba tetiap RM10 chukai suwa bilik hotel semalam ari temuai ari menua luar.