Tikas integriti pengereja pengawa perintah majak manah
KUCHING: Perintah nengah program ke diatur udah mujur ngangkatka ikas integriti orang gawa perintah.
Menteri ba Opis Kepala Menteri ( Integriti enggau Ombudsman) Datuk Talib Zulpilip, madahka pekara nyata dipeda asil pansik ‘SCS Culture Rating Survey’ ungkup pekara integriti.
“Asil pansik mandangka integriti nambah ari 77 peratus ba taun 2015, 85 peratus (2016) enggau 86 peratus ba taun 2017,” ku iya.
Talib mansutka jaku nya rambau nyimpul jurai aum ba Aum Dewan Kunsil Nengeri (DUN) Ke 18 di Komplek DUN ditu, kemari.
Nitihka penerang Talib, semua kluster iya nya kluster opis kepala menteri, menteri, opis residen enggau pelilih sereta ejensi perintah nambah ba peratus.
Ku iya, semua kluster nempa indeks integriti ngelui ikas 85 peratus.
“Pekara tu mandangka pemereti enggau budaya integriti ba orang gawa perintah di nengeri tu majak niki,”ku Talib.
Ba sentang ombudsman, Talib madah ba taun 2017 penyampau 285 sebana diterima Biro Pengaduan Awam Negeri Sarawak nengah Sistem Pengurusan Aduan Awam.
Sebana mungkur kualiti servis enda manah nyengkaum di kaunter enggau tel- efon iya nya 57 sebana tauka 20 peratus.
Servis enda nitihka peneka mensia mayuh 33 (11.6%), enda nitihka prosedur 38 (13.3%), enda chukup perengka guna 35 (12.3%), lemi neritka polisi enggau undangundang 20 (7%)
Enda mujur neritka undang-undang 26 (9.1%), salah nguna kuasa 36 (12.6%), enda adil 21 (7.3%) enggau salah pengawa orang gawa perintah 19 (6.3%).
Ungkup taun 2018 iya nya naka bulan Jun ku Talib, penyampau 230 sebana udah diterima.
“Seratus enam puluh lapan ari sebana nya tauka 73 peratus udah diputar,” ku Talib.