Bisi 95 ari 417 peminta nyadi peranak menua udah dikemendar

KUCHING: Ari penyampau 417 pinta nyadi peranak menua tu, 95 udah diberi pemendar lalu surat pemendar udah disua ngagai peminta.

Menteri Pengintu Pengelantang, Komuniti, Orang Indu, Ruang Bilik enggau Pemansang Nembiak Dato Sri Fadillah Yusuf madah semua pinta nya diperunding kenyau bulan April 2018.

“Komiti ‘ khas’ Peranak Menua nengah Genteran 15A Konstitusyen Renggat Nengeri Sarawak (JKK) ke nyadi kolaborasyen Perintah Nengeri nengah opis menteri tu enggau Opis Pengerijista Bansa(JPN) Sarawak udah baum 16 kali.

“Kitai berandau 417 pinta nyadi peranak menua tu lalu 95 udah dikemendar,” ku Fatimah.

Iya mansutka jaku nya rambau nyimpul jurai aum ba Aum Dewan Kunsil Nengeri( DUN) ditu, kemari.

Ungkup kes ke bukai ke bekaul, Fatimah ngarap pemutus ulih digaga Opis Menteri Dalam Menua (KDN) enggau lengkas.

Kelimpah ari nya, iya madah JPN deka majakka pengawa mutarka isu orang asal nengeri tu ke ada sereta diau di Sarawak tang nadai surat penerang diri.

Nitihka penerang Fatimah, pekara tu deka dikemujur Komiti Teknikal Tim Kereja ‘Khas’(PPK).

“Siti unit ‘khas’ ditumbuh lalu deka ngaga operasyen di kandang menua pesisir nengah bantu pengari rayat, ketuai komuniti enggau tuai rumah.

“Unit tu deka ngenah pinta mensia mayuh ti deka ngaga surat pengada enggau kad pengelala,”ku Fatimah.

Nitihka statistik ari 178 operasyen PPK ku iya nambah, pinta laun ngerijista pengada di serata Sarawak kenyau 2015 nyentuk ngagai 28 Mei 2018 manggai 7,329 pinta.

“Ari penyampau nya, 4,629 pinta udah dikemendar lalu 2,357 ditulak,”ku Fatimah seraya madah 343 mengkang diperunding.