Penanggul suntuk bekal ai deka diputar jampat Sim: RM54.33 juta diungkup ke opis bekuasa kandang menua
KUCHING: Isu suntuk bekal ai di nengeri tu deka diputar enggau lengkas, ku Menteri Utiliti Dato Sri Dr. Stephen Rundi.
Ku iya, chara timpuh pandak enggau chara timpuh panjai iya nya sistem grid ai nyadika pilih perintah ngambika semua isu diputar.
“Kepala menteri enggau Perintah Negeri Sarawak beratika isu tu sereta sistem grid ai Sarawak enggau berat.
“Tang diatu kitai meseti mutarka isu suntuk bekal ai enggau lengkas.
“Sekalika nadai ai, kurang bekal ai beresi, kuantiti tauka pekara bukai ke bekaul,” ku iya ba aum pengarang berita di Komplek Dewan Kunsil Nengeri (DUN) ditu, kemari.
Dulu agi ari nya Rundi nyimpul jurai aum ke bekaul enggau opis menteri iya ba Aum DUN Ke 18.
Rundi madah semua pemar meseti diputar chara holistik lalu mungkur semua pekara.
Iya netapka kandang menua tebing pantai sereta kandang endur ke enda ngulih ngena sistem graviti suah napi penusah suntuk bekal ai.
Kandang endur tu iya nya Sebuyau, Kabong, Pusa, Beladin sereta Sebangan di Pelilih Kota Samarahan.
“Kitai pechaya, pengudah kitai ngepunka program Sistem Grid Ai Sarawak ti begunaka belanja ke besai kitai ulih mutarka isu sebedau 2020,”ku iya.
Ungkup timpuh ke semak tu, Rundi madah isu suntuk bekal ai di Kabong sereta Sebuyau deka diputar.
Ngenang sentang bekal lekterik, Rundi madah semua pemar tauka isu ke bekait deka diputar sebedau 2025.
Ku iya, ba kandang endur ke enda ulih jengkau sistem grid lekterik, sistem SARES tauka chara bukai baka ke solar deka dikena. KUCHING: Perintah nengeri ba taun 2018 ngemendar agih belanja RM54.33 juta ungkup opis bekuasa kandang menua.
Agih belanja nya ku Dr. Sim dikena ngemujur 454 projek infrastruktur di serata nengeri.
“Projek infrastruktur tu nyengkaum pengawa ngangkatmanah lampu jalai, lampu trafik, nyendia agu ungkup mensia mayuh, librari, palan penyangkai enggau palan rekreasyen.
“Ari 454 projek nya, 406 benung digaga diatu lalu majoriti disadang tembu ba taun 2018 tu,” ku Dr. Sim.
Nambah ke nya, iya madah nengah inisiatif komiti ubah menua pesisir, agih belanja RM19.4 juta udah diterima ungkup 42 projek mitigasyen nyeliah ampuh bah ari opis bekuasa kandang menua.
Ku iya, 39 ari penyampau semua projek nya deka tembu digaga ba pengujung 2018 lalu laluh 3 projek tembu 2019.
Kelimpah ari nya, Dr. Sim mega madah RM294 juta dikemendar ba 2018 nengah MARRIS ungkup 24 opis bekuasa kandang menua ke ari baruh perabung opis menteri.
Dr. Sim mega madah opis menteri iya bisi nerima RM6.47 juta ari Opis Menteri Kunsil enggau Berumah, Perintah Besai lalu ungkup opis bekuasa kandang menua.
Agih belanja tu dikena ngemujur projek mit pemansang infrastruktur, tandu Dr. Sim.