Bung Bratak ke ditanam enggau bemacham tambak buah dipelabaka deka nyadi kampung buah maya musin buah
KUCHING: Raban pegawai Gerempung Adat Pesaka Bung Bratak (BBHA) benung majakka pengawa sida iya nanam tambak pun buah di serata sitak Bung Bratak ari 15 Julai tu tadi.
Chairman BBHA, Dato Peter Minos madah entara igi tambak ke ditanam ulih sida iya, nyengkaum buah rian, nyiur enggau sekeda buah bukai.
“Pun buah ke ditanam tu kena nambah pemayuh pun rian enggau langsat ke sigi udah ditanam ditu.
“Enti udah musin buah ila, kami deka ngaga festival buah di Bung Bratak, alai buah rian ditu ke tampak rita sigi datai ari sitak tu,” ku iya madah pengudah nanam tambak buah di Bung Bratak, kemari.
Sida BBHA nandu baru madahka, bedau lama tu tadi, sida iya bisi madu seiku pakar ke landik dalam pengawa landskap, ngasuh iya ngaga endur nya gadung, kelimpah ari ngemanahka agi lanskap BBHA.
BBHA udah ngembuan kelala iya empu, enggau pemisi rumah temuai ‘homestay’, endur baum, tang ka agi dikelala enggau palan gadung ke ngembuan landskap ke manah, ku iya.
Nya alai ku iya, ngelalau tetiap renggat mensia mayuh ngasaika tanggungpengawa nyaga, ngintu rampa menua di Bung Bratak.
“Anang semina ngarapka Perintah aja nyaga sereta nyaga pun kayu, flora enggau fauna, sungai, jeram, tauka bukit,” ku iya.
Minos pechaya Bung Bratak nyadi kedap ngagai Kuching ba pengawa mekal oksigen lalu ditambah enggau penuduk ke strategik ke semak enggau mengeri.
Dalam timpuh nya mega, ba pengawa ngaga BBHA nyadi palan matak sejarah sereta eko- dagang temuai, sida BBHA enda ngachau tauka ngerusak sebarang ekosistem rampa menua asal ke bisi ba sitak nya.
BBHA semina nyadi penjaga ngagai bukit ke ngembuan kampung ‘primer’ ditu ke dikunsi tanggungpengawa nya enggau Opis Kampung.
Sebedau tu, seraban pelajar universiti ari Australia bisi udah bemalam dia dalam kandang berapa minggu lalu madahka pengerindu sida iya lebuh ngelawa Bung Bratak.
Udah BBHA nya tembu manah ila manggai 1 Januari taun baru tu, urung 100 nembiak Australia deka datai lalu diau dalam kampung Bung Bratak nitihka pengelama kedeka sida iya.
Kami mega ngelaluka temuai ari menua luar ngelawa kami ditu, ku iya.