Komuniti Kayan dilalau majakka kaul enggau majoriti etnik nengeri tu enti deka mansang
MARUDI: Raban bansa Kayan nadai pilih bukai kelimpah ari sida meseti meruan begempung sereta terus belajar ari raban majoriti di nengeri tu laban penyerakup enggau ulah ke seruran muka runding enggau ati sida, deka nyadi pugu pekara beguna amat dalam pengidup, ngambika sida ulih nyingkang ke mua.
“Kelebih agi diatu tebal agi kitai diau jauh ari menua diri, udah nyadi pekara dikemeratka kitai nguji nunda enggau ngubah gaya ulah ngagai idup sereta terus nyerungkai pekara baru lalu nentuka kitai ulih nyungkak ekonomi ruang bilik diri.
“Kitai ke diatu enggau ni naka penuduk kitai sehari tu, semua tu asil ari pengawa aki ini kitai menya milih ngetanka penyerakup taja napi pemar ketegal penyuntuk nyauka ba semua pekara dalam idup sida. Bala sida ngintu, mutarka semua penekul lalu asil iya muka awak dikena nyapai pengidup menyana agi sehari tu.”
Kaban Kunsil Nengeri (ADUN) Telang Usan, Dennis Ngau mansutka jaku tu lebuh ngepunka Pekit Badminton Tertutup Orang Ulu ti diatur ulih Serakup Kayan Sarawak (PKS) pampang Marudi di Balai Komuniti Good Shepherd ditu, Hari Enam tu tadi.
Ku Dennis, kena negutka agi kaul serakup raban bansa kitai ba pemar dunya kemaya hari, kitai patut netapka runding numbuhka serakup raban bansa kitai empu ngambi nyadika pelasar ngagai raban bansa kitai, Kayan, neguhka agi sintal kaul enggau pangan diri.
“Nadai orang bukai ulih ngingatka kitai kelimpah ari kitai empu, kaban komuniti mit baka kitai tu begunaka semua orang bejalaika pangku pengawa diri ngenegutka raban bansa kitai laban lumur nyadi kelai pengering.
“Enti nadai pengering, kitai ti nyadi komuniti mit enda diketatika ngujungka kitai enda ulih bejalaika tanggungpengawa diri ba pengawa nempa menua bansa.
“Kitai chukup temegah ati enggau bala ketuai kitai kemaya hari, taja penyampau tubuh kitai semina urung 80 ribu iku, kitai diberi awak nyadi bala ketuai nengeri tu ti ngasuh bala pengari rayat kitai mantaika peminta raban bansa kitai,” ku iya.
Nya kebuah ku iya, jaga memanah pekara dikemisi kitai diatu lalu raban bansa Kayan dikelala enggau pengering sida.
“Enti sema kita bisi sebarang pengering ba diri empu – kena pengering nya ungkup pemaik,” ku iya.
Ngelansa aktiviti main ti diatur, Dennis madah raban pengatur ukai semina natak ungkup raban bansa Kayan aja, tang mega mungkur sida ti rinduka main ti baru ke Komuniti Orang Ulu, lalu tu manah amat dikena nempa semengat gawa kelebih agi ngagai kita ke diau ditu enggau ngelingi pasar Marudi.
Ku Dennis, sida ukai semina begunaka lumur baka komuniti Kayan, tang sebela beguna amat laban komuniti pemadu besai baka Orang Ulu. Pekara tu mega beguna amat nyadi sebagi ari perintah Nengeri ba kesemua perambu pemansang baka ti udah dilalau Kepala Menteri kitai, Datuk Patingi Abg Johari Tun Openg.
Dennis mega beratika awak nerangka pekara bekait enggau Kanun Tanah baru, alai pekara nya diatu udah diberi kuasa UndangUndang ba tanah adat bansa asal Sarawak ti dikumbai Pemakai Menua enggau Pulau Galau, ke udah dikumbai ‘Native Territorial Domain’.
“Ari sekeda bida penemu dibantai ti mega ngemai saru penemu ba pekara tu, aku deka ngansak bala kitai meretika konsep sapa ti ngasuh kita meretika kebuah pemutus tu digaga bansa tu.
“Anang pechaya semua pekara dibacha kita ba media rama kelebih agi sida ti bisi penemu kediri empu lalu ukai orang ti megai perintah di dunya nyengkaum perintah komunis ti deka nipu peranak kitai baka ti didawa sekeda orang ti enda betanggungjawab.
“Bala sida semina nyebut beberapa pekara tang lebuh ngundi nyukung usul nya, sida semina diau diri kelai sida setujuka Kanun Tanah baru bekaul enggau ‘Native Territorial Domain’.
“Ba aku, nadai guna kekerah bejaku di luar Dewan laban Forum ti patut endur bejaku enggau mantai penemu enti sida enda setujuka mosyen iya nya dalam Dewan,” ku Dennis.
Dennis ti mega nyadi Presiden serakup, merambu kesemua enam pampang Serakup Kayan Sarawak di serata nengeri chakah ngatur aktiviti dikenyadika jalai, pelasar dikena neritka agi kaul komuniti etnik nya.
Ba Pekit Badminton Serakup Kayan Sarawak Pampang Marudi keterubah, bisi 15 tim bepadu ngambi bagi dalam kategori lelai seraya lapan tim ngambi bagi ba kategori indu.
Bela datai ba pengawa nyuaka perais iya nya bala kaban Serakup Kayan Sarawak Pampang Miri, Gurung Was, Chairman Komiti Koodinat Komuniti Telang Usan, Marudi Lah Emang, Kaunsilor Dominic Nyurang enggau Kaunsilor Jok Ngau sereta lebih ari 100 raban bansa Kayan enggau Orang Ulu di Marudi.