PKR enggau Amanah diungkup 40 enggau 13 penuduk ari 82 penuduk ke deka direbut, ku Chong
KUCHING: Pakatan Harapan ( PH) Sarawak deka bediri minta pilih ba semua 82 penuduk Bepilih Kunsil Nengeri (DUN) maya Pengawa Bepilih Nengeri Ke-12 (PRN12) taun 2021 ila.
Chairman PH Sarawak, Chong Cheing Jen madah ari penyampau nya, 29 penuduk deka direbut Parti Tindakan Demokratik (DAP), seraya Parti Keadilan Rakyat (PKR) enggau Parti Amanah Negara (Amanah) bela deka bediri minta pilih ba 40 penuduk enggau 13 penuduk.
Taja pia ku Chong ke lalu nyadi Chairman DAP Sarawak, pengawa magi penuduk tu semina deka ditetap pengudah disetuju ketetiga parti.
Rambau PRN sebedau tu ku iya, udah meda beserak enam penuduk antara DAP enggau PKR iya nya di Mambong, Batu Kitang, Simanggang, Ngemah, Mulu enggau Murum.
Seraya dua agi penuduk iya nya Bukit Sari enggau Bukit Kota ti bela nitihka pematut dipenggi PKR enggau DAP ke alai Barisan Nasional (BN) udah menang di darat.
“Nya alai, kami ( DAP Sarawak) sehari tu (kemari) udah netapka penemu deka bediri ba 25 penuduk ti enda direbut PKR.
“Seraya ari enam penuduk beserak, tiga deka direbut DAP iya nya Mambong, Batu Kitang enggau Simanggang seraya penuduk Nyemah, Mulu enggau Murum deka direbut PKR.
“Ba penuduk Bukit Kota nitihka pematut direbut kami rambau PRN tu tadi deka direbut DAP, pia mega ba penuduk Bukit Sari ti bela deka direbut PKR.
“Enti formula tu disetuju, DAP deka bediri minta pilih ba 29 penuduk, PKR deka bediri minta pilih ba 40 penuduk lalu AMANAH deka bediri minta pilih 13 penuduk,” ku iya.
Chong mansutka jaku nya rambau aum pengarang berita di Indu Opis DAP ditu malam kemari pengudah aum komiti nengeri keterubah DAP.
Semua 29 penuduk deka direbut DAP iya nya Tasik Biru, Padungan, Pending, Kota Sentosa, Batu Kawah, Batu Kitang, Stakan, Mambong, Kedup, Bukit Semuja, Simanggang, Repok, Meradong, Pakan, Bukit Asek, Dudong, Bawang Assan, Pelawan, Pelagus, Katibas, Bukit Goram, Tanjong Batu, Kemena, Samalaju, Piasau, Pujut, Senadin, Bukit Kota enggau Baleh.
Chong ke mega Kaban Kunsil Nengeri ( ADUN) Kota Sentosa, ngarapka formula tu deka disetuju lalu iya enggai semina ketegal berebutka siti tauka dua penuduk, semua pakatan enda ulih bekerejasama.
“Ba penemu aku, tu atur chara lurus lalu kami (DAP) deka mantaika perambu tu dalam aum begulai enggau PKR enggau AMANAH ila,” ku iya bela madah nyangka enda bediri minta pilih ba penuduk Kota Sentosa maya PRN2021 laban nyangka deka bediri minta pilih ba penuduk bukai.
Rambau aum pengarang berita nya, Chong bela meri pengaga ati ngagai Tan Sri Richard Malanjum ti udah dipadu nyadi Ketuai Akim Menua ti baru.
Tabi puji mega dituju ngagai Datuk David Wong Dak Wah ti udah dichiri nyadi Akim Besai Sabah enggau Sarawak.
Enti formula tu disetuju, DAP deka bediri minta pilih ba 29 penuduk, PKR deka bediri minta pilih ba 40 penuduk lalu AMANAH deka bediri minta pilih 13 penuduk. Chong Cheing Jen Chairman PH Sarawak