Pengempu tanah NCR enda ibuh nangi, tanah udah diaku perintah
LIDONG, Betong: Pengempu tanah diatu enda ibuh nangi agi laban perintah udah ngaku sida ngempu tanah Adat Bansa Asal (NCR) rambau Aum Kunsil Nengeri (DUN) Hari Empat tu tadi.
Tu mih pemeri ke pemadu besai reti ngagai rayat datai ba pengawa ngintu Hari Sarawak kena 22 Julai tu, reti iya nadai agi isu NCR ti mekuh rayat ngelama tu.
“Ari nya, tu nyadi pemenang ke semua. Kitai pengempu tanah NCR patut meri terima kasih ngagai perintah kelebih agi ngagai Datuk Amar Douglas Uggah Embas ti udah bebendar mutarka isu tu,” ku Dr Rayong.
Kaban Kunsil Nengeri (ADUN) Engkilili Dr Johnical Rayong Ngipa mansutka jaku nya lebuh bejaku ba Program Pemesai Begulai enggau Rayat di Rumah Harry Nanang, Tembong, Skrang ditu, ensana.
Nangkan nya ku iya, pengawa ngaku tu mega nulak tuduh penyakal enggau raban NGO sida ti ngumbai perintah ngerampas tanah Temuda enggau Pulau Galau rayat.
“Kami mega udah digerah Uggah ti mega chairman ba isu tu ngambika mantah mosyen dikumbai ‘Usufructuary Right’ ti enda bepiak ngagai pengempu tanah, enda patut kitai ti ngempu tanah Temuda enggau Pulau Galau semina ulih bejalaika semua aktiviti betanam enggau ke bukai tang enda tau ngempu,” ku iya.
“Nasit amat perintah Sarawak di baruh iring Datuk Amar Abang Johari Tun Abang Openg sereta Uggah meretika sentimen enggau peminta rayat lalu nulak mosyen nya enggau ngaku tanah, ukai semina tau dikena aja tang mega ulih diempu kelimpah diberi pala tanah,” ku iya.
“Pemesai mega ditambah ari 500 ekar ngagai 1,000 ekar bepanggai ngagai pemayuh komuniti ba menua nya,” ku iya seraya nambah, nadai awak ngagai sebarang sarikat ngereja tanah nya.
Ku iya, sida ti bejuraika isu nya semua pengari rayat sereta sida ti nyukung perintah lalu ukai sida ari penyakal.
“Tu pekara balat ngasuh sinu lalu gaya ulah ke amat pengari rayat sida, lebuh isu tu dibantai, dipejurai sereta disimpul, ayas sida nadai dipeda lalu nadai meri penemu ba isu tu.
“Sehari udah nya, NGO enggau sida ti nyukung udah ngatur gempuru likun ngumbai perintah enda ngaku Pemakai Menua enggau Pulau Galau,” ku iya.
Ngumbai raban tu nyadi ‘opportunist’ ngagai semua pengawa digaga perintah, Dr Rayong ngansak pengempu tanah anang mendingka jaku ajum nya.
Ngelansa pasal isu bukai, Dr Rayong ngelalau rayat bejejimat enggau agenda penyakal kelebih agi parti penyakal ti bepalan di Semenanjung Malaysia.
“Nadai ngira nama sentimen enggau semaya sida, semina parti Sarawak ti mere- tika juluk enggau peminta rayat di nengeri tu.
“Kitai enda patut nejuka diri empu dikemelikka sida laban semaya bepilih sebedau tu apin dikeamat baka nurunka rega barang enggau minyak,” ku iya seraya nambah, pengawa perintah minta hak nitihka sempekat MA63 sereta hak ngali minyak diempu Sarawak patut dikemerat sereta disukung.
Berindik ari nya, Dr Rayong minta rayat seruran bediri teguh di belakang bala ketuai nengeri sereta pengari rayat begulai gawa negika hak Nengeri Sarawak ti ngelama tu lenyau sekalika ditemu enggau enda laban kitai mega nempa sebuah menua, iya nya Malaysia.
Berebak enggau program ke sama, Dr Rayong mega bisi ngemendarka geran MRP ngagai Komiti Pemansang enggau Pengelikun Genturung Pendiau (JKKK) enggau Biro Indu Rumah Harry bela penyampau RM5,000, lalu kesemua pemeri tu manggai RM10,000.