Penatai temuai ke Sarawak bisi nambah naka bulan Mei 2018

KUCHING: Taman Negara Sarawak dikerindu temuai ari dalam enggau luar menua ketegal pemanah rampa menua enggau jelu siga.

Naka bulan Mei 2018, Karim madahka Taman Negara di nengeri tu ngerikod 186,486 temuai sereta mai penatai pemisi RM2.18 juta.

“Ari penyampau nya, 73 peratus tauka 136, 573 iku temuai ari dalam enggau 27 peratus tauka 49, 913 ari luar menua.

“Penyampau temuai ke datai dalam timpuh tu chukup manah lalu temuai ari menua luar nambah 18.33 peratus.

“Enti dikira semua penyampau penatai temuai, peratus niki 0.88 peratus enti dibandingka timpuh ke sama ba taun 2017,”ku Karim rambau Aum Dewan Kunsil Nengeri (DUN) ditu, kemari.

Iya nambah Palan Jelu Siga Semenggoh ngerikod penyampau temuai ke pemadu mayuh naka bulan Mei 2018 iya nya 28, 572 iku temuai.

Taman Negara Bako nerima 10, 358 iku temuai, Taman Negara Santubong(9,367), Taman Negara Nuah(8,636), Taman Negara Mulu(7,781) enggau Taman Negara Bukit Lambir nerima 4, 485 temuai.

Karim nambah, Palan Jelu Siga Matang udah menang tropi Kepala Menteri ba taun 2017 ketegal pemanah ba tusun pengawa, ngintu enggau ngibun.

Kelimpah ari nya, Karim mega madah perintah nengeri deka ngelanchar Kimpin Nemuai ke Sarawak ba ujung taun tu.

Kimpin deka ngeletak Sarawak nyadi palan pematak temuai ke tebilang di menua tu.