Elawin 37 tuai rumah, tiga penghulu ari Engkilili ti tejanggal patut diputar
KUCHING: Sepenyampau 37 tuai rumah enggau tiga penghulu ari sitak Kunsil Nengeri ( DUN) Engkilili ngapil ngagai raban bekaul ngambi lengkas ngaduka bayar elawin ti tejanggal pengelama 10 bulan.
Pengari sida sebuat, Tuai Rumah Johnson Damu madahka sida bekenaka media mantaika pengasa diri laban raban bekaul nadai meri sebarang timbal bekaul enggau elawin laun dibayar nya.
“Aku mantaika isu tu ngagai raban media pengudah suah dipinta pengari sida tu ti madahka diri bedau nerima elawin taja surat chiri mangku pengawa udah diterima,” ku iya ke nyadi Chairman Serakup Tuai Rumah DUN Engkilili.
Pia mega ku iya, tetiap kali sida betanyaka pekara ngagai pengari ari Opis Pelilih Mit Engkilili, saut diterima sida balat ngasaka ati, benung diatur.
“Kami ukai raban ti mejal laban meretika pangku pengawa sida, tang enti ‘benung diatur’ nya manggai 10 bulan, reti iya bisi pekara enda betul nyadi lalu raban bekaul puntan bejalaika tanggungpengawa sida,” ku iya.
“Dalih bukai ti diterima nyengkaum begunaka aku ari polis sekalika sida nadai ngereja penyalah berat, tu enda ulih diterima akal laban enda patut surat chiri dikeluar dulu agi sebedau diaku polis,” ku iya seraya nambah, pengawa nyiri kesemua 40 iku nya udah diaku pengari rayat sida.
“Sebedau tu, abis lama pin tiga bulan aja sebedau elawin diterima, tang sekali tu ngaul timpuh pemadu panjai, manggai 10 bulan,” ku iya.
Ku iya, bala sida napi pemar bejalaika pangku pengawa nyadi tuai rumah enggau penghulu enti sema elawin enda dibayar lalu dekaka Unit Ngatur Pengawa Opis Kepala Menteri beratika pekara tu berat agi.
Ku Tuai Rumah Johnson, iya enda sanggu mai sida tu ngaga ripot polis enggau dalih sida bekereja nadai elawin ti diterima nitihka pematut.
Berebak enggau nya, ADUN Engkilili Dr Johnical Rayong Ngipa lebuhka dirandau mantaika pengasa diri senentang penanggul elawin laun dibayar ngagai kesemua ketuai renggat baruh nya.
“Aku suah udah dipadah pasal isu tu lalu udah beberapa kali berandau enggau raban ti dilempai tanggungpengawa betanyaka pun penanggul tu nyadi. Saut sida enda ulih diterima akal, agi diserenih raban polis tang surat chiri nyadi tuai rumah enggau penghulu udah diterima 10 bulan ke udah,” ku iya.
“Aku ukai sepeneka ati nyiri tuai rumah enggau penghulu baru enti sida bisi rikod enda manah lalu enda nerima sukung mayuh, tang kesemua sida tu pass ba KPI ti udah ditetap aku enggau Opis Pelilih” ku iya.
Berindik ari nya, Dr Rayong minta isu tu diputar lengkas lalu enda dipanjai laban tu deka meri pangka enda manah ukai semina ngagai kualiti kereja, tanggpengawa sida ba atur pengawa besehari sehari aja, tang mega ngagai pengari rayat enggau perintah Nengeri.
“Enti kita udah ngasaika pemedis kereja enda begaji dalam timpuh sebulan, baka ni raban tu ti nadai nerima elawin pengelama 10 bulan,” ku iya nanya.