Atur baru digaga perintah bekaul ehailing, diterima bala deriba teksi
SIBU: Pengawa perintah ti megai servis e-hailing deka nyaup sida ke mai teksi ngelempungka tating penusah ke ditapi sida ngelama tu.
Sekretari Gerempung Orang Beempu Teksi Sarawak, Robert Angkah madah, pemutus perintah nya berita manah ngagai sida.
“Terima kasih ngagai perintah laban deka nulung kami ke mai teksi nengah chara baru tu,” pia ku iya madah.
Iya bejaku munyi nya maya dipinta meri penemu nimbal penerang Menteri Perengka Pengangkut, Anthony Loke ti madahka semua pekara bekaul enggau servis e-hailing deka dipegai perintah nengah Akta Pengangkutan Darat ( Pindaan) 2017 enggau Akta Lembaga Pelesenan Kenderaan Perdagangan (Pindaan) 2017.
Semua kompeni e-hailing mega meseti direjister ba Suruhanjaya Pengangkutan Awam Darat (SPAD) sereta meseti mayar RM115 setaun, sebaka enggau deriba teksi.
Ku Robert, sebedau tu piak ke ngena servis ehailing enda dikemendar meresa perengka pengangkuts sida enam kali sebulan, ngemaruka permit ninting taun, beperesa pengerai, alai semua tu sebedau tu dikereja deriba teksi.
“Pengawa perintah tu endang dianti kitai ngelama tu.
“Kami ke deriba teksi berasai bendar sepengudah e-hailing dipejalaika.
“Kami mega bekenaka belanja RM500 meresa teksi enam bulan sekali. Tu enda nyengkaum belanja bukai dikena nentuka teksi tauka perengka pengangkut ke bukai semampai likun,” ku iya sambil madahka pekara pengelikun orang ke nepan nyadi batang pekara ti dikemeratka sida.
Taja pan baka nya ku Robert, sida ke beempu e-hailing enda ibuh ngereja pengawa baka nya ngambika sida ngeletak rega tambang murah agi enti sida bekena puku ti mimit.