Penanggul ke ditapi iya nya bedau disambung bekal elekterik, ai beresi enggau sekula ke udah tuai sereta jai
KUCHING: Opis Menteri Pelajar, Sains enggau Pansik Teknologi deka mutarkasereta sekula di menua pesisir nengeri tu ke bedau disambung bekal elekterik,ai beresi enggau sekula ke udah tuai sereta jai.
Menteri iya, Dato Sri Michael Manyin Jawong madah, mutarka penanggul nya sereta pemar besai ke ditapi opis menteri lima taun tu.
“Ba taun 2018, bisi 371 buah sekula di menua pesisir Sarawak bedau disambung bekal elekterik lalu semina bepanggai ba injin api.
“Dikena nentuka sekula nya nadai napi penanggul bekal diesel, Opis Pelajar Nengeri udah diberi kuasa terus meli diesel nyentuk RM20,000 sebulan enggau RM200,000 ungkup10 bulan ke tetiap buah sekula nya.
“Direktor udah meri langkar prosedur meli baka nyiri sebuah kompeni ungkup sebuah sekula, lalu kitai berat agi ke kompeni menua tu empu, pemekal enda tau enda berejista enggau Opis Menteri Wang Perintah Besai sereta enda tau enda nitihka prosedur pekara wang enggau perintah Opis Pekara Wang Menua.
“Opis Pelajar Nengeri deka nentuka operasyen sekula nadai napi penyuntuk bekal diesel,” ku iya dalam aum pengarang berita.
Dulu ari nya, pekara ke sama mega disebut maya iya nyimpul jurai Opis Menteri Pelajar, Sains enggau Pansik Teknologi ba Aum Kunsil Nengeri Ke-18 Hari Ke-7 ti diatur ba Kompleks Kunsil Nengeri ditu, kemari.
Di baruh kontrak ke diatu Opis Menteri Pelajar Perintah Besai kenyau 1 Januari 2017 (ke mayuh narit kontroversyen), semua sekula nya deka dipasang ngena sistem solar hibrid, tang kitai ngasaika nya ukai dikena mutarka semua penanggul nya, ku iya.
Maya Manyin ke benung nyimpul jurai nya, Kaban Kunsil Nengeri (ADUN) Layar Gerald Rentap Jabu madahka sekula ba Bagi Menua Betong ditemu napi penanggul nadai diesel baka SK Lidong (DUN Engkilili), SK Lawih (DUN) Layar sereta SK Nang Tiga (DUN Bukit Saban) sereta sebuah sekula di Debak.
“Baka sekula aku SK Lawih bisi napi epenanggul tu urung lima hari ke udah, SK Nanga Tiga napi penanggul tu urung seminggu.
“Penanggul tu ngeruga kelebih agi nembiak ke bemalam ba buding baka penanggul naruh bekal pemakai laban ke nadai peti ais,” ku Rentap seraya madahka penyampau RM20,000 enda chukup dikena dalam kan- dang sebulan.
Bejaku baru, Manyin madahka dalam taun 2017, opis menteri nya bisi nganjung keretas perambu bekaul 113 buah sekula ti dalam kandang sepenyauh 10 km ari grid elektrik, ke ulih disambung ngagai grid.
Ku iya, penyampau ungkus belanja ti dianggar (dikena nyambung sekula ti dalam 10 km ari grid elektrik) iya nya urung RM50 milion.
“Opis menteri aku deka terus ngemanjaika pekara tu ngagai Opis Menteri Pela- jar Perintah Besai dikena ngenukuka sekula nya ulih ngasaika bekal elekterik 24 jam.
“Nengah bekal elek terik 24 jam nya, nembiak enggau pengajar deka ngasaika pengelantang baka sida (nembiak enggau pengajar) di mengeri,” ku iya.
Nitih ku Manyin, bisi 258 buah sekula ke urung dalam lebih 20 km ari grid elekterik, dikearapka ulih disambung ngena sistem solar hibrid.
Lebuh ke ngenang pasal sekula di Sarawak ke nadai bekal ai beresi, Manyin madah naka ke diatu bisi 428 buah sekula nadai nerima bekal ai beresi nya.
Sekula nya ku iya bepanggai ba ai ujan, ai paip graviti, ai telaga enggau ai ari sungai. Kualiti ai nya pekara enda temu pemanah.
“Opis Pelajar Nengeri Sarawak ba taun 2016 bisi udah nganjung keretas perambu ngagai Opis Menteri Pelajar bekaul enggau 62 buah sekula ti urung dalam satu (1) km ari paip besai ngambika disambung ti dipelabaka ngena ungkus belanja urung RM9.3 milion.
“RM2.3 milion udah dikemendarka Opis Menteri Wang Perintah Besai kena 1 Jun 2018, sereta Opis Pelajar Nengeri agi nganti waran,” ku iya.
Kelimpah ari nya Manyin mega ngenang penggaul bekaul enggau 721 buah sekula di Sarawak ke bedau disambung jalai ti meruan.
“Ari penyampau nya (721 buah sekula), bisi 200 buah sekula semina ulih dilawa nengah sungai tauka tasik, lalu 521 buah agi bedau ngasaika sambung jalai,” ku iya.
Penanggul tu ukai semina meri empas ngagai penatai nembiak ke sekula tang mega ngeruga meri empas ngagai pengajar ke pulai hari.
Komitmen enggau moral pengajar ti meri servis ngagai sekula tu deka tekeruga laban pekara ke dikearapka enda baka ti disadang sebedau datai ke sekula, ku iya, ti ngujungka penyampau pengajar minta pindah sekula endur ngajar tinggi.
Kelimpah ari nya, lebuh ke ngenang pasal sekula tuai sereta jai ba Sarawak, Manyin madahka ba Sarawak bisi 1,020 ari 1,454 buah sekual ba nengeri tu udah tuai sereta jai lalu 415 buah sekula nya udah kelalu tuai sereta kelalu jai ti udah dikemendar kemanah sereta digaga baru dibaruh Langgur Pemansang Malaysia Lumpar Ke-11.
Iya madahka 210 sekula ke udah kelalu tuai sereta kelalu jai digaga baru ngena ungkup belanja khas RM1 bilion dikena dalam timpuh dua taun dibaruh bajet 2018, ke alai RM500,000 ungkup taun 2018 enggau RM500,000 taun 2019.
“Taja pia naka ke diatu Opis Menteri Pelajar Perintah Besai udah meri kuntrek ngemanahka 116 buah sekula, ke alai 50 buah dipejalaika JKR Sarawak lalu 66 buah sekula dibaruh Opis Menteri Pelajar. Lalu penyampau kuntrek iya nya RM419.05 milion,” ku iya.
Ba taun 2018, bisi 371 buah sekula di menua pesisir Sarawak bedau disambung bekal elekterik lalu semina bepanggai ba injin api. Dato Sri Michael Manyin Jawong Opis Menteri Pelajar, Sains enggau Pansik Teknologi