Kapit agi begunaka pegung ai kena mutarka bekal ai ke suah endar nadai
KAPIT: Kaban Kunsil Nengeri (ADUN) N63 Bukit Goram Jefferson Jamit Unyat madah ngagai Kunsil Nengeri, iya nya Kapit agi begunaka palan nekat ai kena ngemutarka bekal ai ke suah endar nadai, kelebih agi ba genturung pendiau mensia mayuh niti Jalai Selirik enggau Jalai Bukit Goram.
“Taja pan bisi Palan Meresi Ai ke udah tembu digaga berapa taun tu ke udah, Kapit agi napi kurang bekal ai kelebih agi ba genturung pendiau mensia mayuh di Jalai Selirik baka di Taman Ixora, Taman Indah, Taman Gelong, Taman Bian Hua, Taman Chelsea Heights, Melatai, Gentulong, Kampong Bulan, Kampong Sawang enggau Jalai Bukit Goram baka ke di Kampong Cina enggau Goram Heights.
Jefferson Jamit Unyat ADUN N63 Bukit Goram
“Penanggul kurang ai ditambah agi enggau pemayuh genturung pendiau mensia mayuh digaga nyengkaum rumah kediri digaga baka ba Jalai Kapit/Ng Yong, Jalai Ulu Sungai Yong, Jalai Kapit/Song, Jalai Antaroh/Sut, Jalai Melekun/Nanga Mujong enggau Jalai Bukit Goram.
“Nya alai, aku nyadang ngagai perintah nambah pe- gung ai ke Kapit, lalu mekal ai beresi ngagai genturung pendiau mensia mayuh ke baru digaga ba jalai tu, ke pinta bekal ai ke majak nambah,” ku Jamit madah ba aum Kunsil Nengeri (DUN) ditu, bedau lama tu tadi.
Iya mega minta perintah nganti batang paip ke udah lama niti Jalai Selirik enggau Jalai Ulu Sungai Selirik.
Ba lansa bukai, Jamit mega madahka Kapit berat endar deka ngembuan sebuah stadium mit (mini-stadium) ke tau mega digaga nyadi padang alai main bol, ke bela bisi nyendiaka trek alai orang belanda, laban bisi pinta ari mensia mayuh ke berat endar deka ngangkatka lumba enggau mianb kelebih agi bala nembiak ke bisi pengerindu bemain bol.
“Kediatu, Kapit semina bisi sebuah aja padang alai bemain bol di stadium mit ba Jalai Airport, ti disediaka kena bemacham pengawa lumba enggau main di pelilih menua nya, tang enda chukup kena lumba enggau main enti nyengkaum sekula, kelab enggau gerempung sereta opis Perintah baka main bol MAKSAK. Nya alai, aku minta perintah ngaga staidum mit ke Kapit,” ku Jamit.