Kort Tinggi netapka 10 Ogos ngaga pemutus kes munuh aktivis Bill Kayong

MIRI: Kort Tinggi kemari dipadah belalauka DNA ti ditemu ba sarung senapang enggau engkabung mua ti ngipak enggau DNA orang keterubah ti didawa, Mohamad Fitri Pauzi, terang mandangka Fitri nyadi orang ti ngereja penyalah dalam kes bunuh Bill Kayong.

Sapit Pendakwa Raya (TPR) Nur Nisla Abdul Latif nyemetak madahka pekara tu lebuh nyimpul jaku iya ba kes ke penudi, kes ngenanka diri, alai Fitri didawa munuh aktivis rama kena 21 Jun 2016.

Nya alai minta ngagai kort ngambi mutuska pechara lalu ngukum orang ti dituduh nitihka Seksyen 302 Kanun Keseksaan laban munuh sereta ngeletak ukum ti seti- pak ngagai iya.

Dulu ari nya, kort netapka kemari ngambi mendingka penerang kepenudi ari kededua piak ngempu dawa enggau peguambela iya ti dituduh.

Pengudah mendingka penerang kepenudi ari kededua raban ngempu dawa enggau ngenanka diri, Akim Ravinthran N. Paramugara udah nya netapka 10 Ogos tu endur ngaga pemutus kes.

Seraya iya ti didawa diperintah ditan baru di Rumah Jil Besai Miri seraya nganti hari bulan nya.

Fitri, 30, ari Jalai Dawai 1 Pujut 4D ditu udah didawa nitihka Seksyen 302 Kanun Keseksaan laban penyalah munuh ngujungka pemarai niang Bill Kayong.

Enti ditukuka salah, iya ti didawa tau kena tinggang ukum mati mandatori.

Penyalah tu padah dikereja iya ti kena dawa dalam urung pukul 8.20 pagi, 21 Jun 2016 di simpang lampu trafik besemak Pasar Besai Emart, Jalai Kuala Baram Bypass ditu.

Seraya dalam jaku penerang iya, Nisla dulu agi udah nimbal penerang bekaul enggau dua pekara ti bisi dibantaika ari piak le ngenanka diri rambau sebutan kes ke suba bekaul enggau senapang patah sereta mega leka seterum dalam kes nya.

Iya mega madahka piak ke ngenanka diri nadai mantah penerang ari saksi ke-25, Lau Lee Shen bekaul enggau hari bulan Fitri ngambi senapang patah ti disimpan di rumah Lau kena lemai 30 Mei 2016 lalu mulaika iya baru ngagai Lau kena tumu pagi 31 Mei 2016.

Kenu ku iya, hari bulan nya ulih dikingat saksi enggau terang laban sehari pagila (1 Jun 2016) nyadi hari maya ngintu Hari Gawai Dayak.

Kelimpah ari nya ku iya, belalauka DNA ti ditemu ba sarung senapang enggau engkabung mua ti setipak enggau DNA Fitri, terang mandangka Fitri ti nyadi orang didawa keterubah nyadi orang ti ngereja penyalah (munuh) dalam kes tu.

Ba kes ngenanka diri nya, Fitri diarika peguambela Ranbir Singh, Orlando Chua enggau Arthur Lee.

Sama bisi datai Majen Panyog ke nyadi luyar pemerati ngagai sida Bill sebilik.