Bansa Dayak chakah sereta ransing mantai main asal ngagai bansa bukai di BDCF, BCF
SIBU: Panggau Mantaika Main Asal Dayak Borneo (BDCF) ke diatur beserimbai enggau Pengerami Mantaika Main Asal Borneo (BCF) 2018 serak tu dikemujurka agi enggau penatai raban nembiak ari empat buah sekula sekondri.
Chairman Komiti Pengatur BDCF 2018, Paulus Dandee Banyang madah, tu mandangka bansa Dayak chakah sereta ransing mantai main asal ngagai bansa bukai.
“Aku temegah ati deka madah, pengawa kitai ti mantaika main asal bansa diri ba panggau BDCF taun tu bela dikemujurka bala nembiak sekula.
“Sida tu tadi ari SMK Durin, SMK Julau, SMK Julau 2 enggau SMK Kemuyang,” pia ku iya maya aum media BCF 2018 ditu, kemari.
Aum pengarang berita BCF 2018 nya betuaika Sapit Chairman Opis Kaunsil Sibu (SMC) Rogayah Jamain.
SMK Durin deka mandangka Ajat Kumang kena 20 Julai (hari kedua BDCF) lalu hari siti gintir SMK Julau mantaika Ngajat Ngalu Temuai kelimpah Ngajat Ngauk Ai ari SMK Julau 2 ba lemai ke sebaka.
Kelimpah ari nya, bala nembiak sekula ari SMK Kemuyang mantaika Ajat Dayak.
Paulus mega madah, panggau BDCF 2018 deka dipenyadi Temenggong Stanley Geramong kena 21 Julai.
“Malam kepenudi iya nya kena 25 Julai, pengerami nutup panggau BDCF 2018 deka dipenyadi Menteri Perengka Mensia Mayuh Datuk Dr Stephen Rundi Utom.
“Iya maya tu bela disempulang sekretari mendam iya, Dato Ir Alice Jawan,” pia ku iya madah.
Baka taun sebedau tu, Paulus madah, panggau BDCF 2018 dirichahka enggau pekit kepenudi Miss BDCF 2018 ke diatur malam penudi iya nya 25 Julai.
“Sepemanjai tujuh hari tu, komiti kitai naka alah mandangka macham bansa main asal ngagai mensia mayuh ke bisi datai.
“Pia mega, ninting lemai mega kitai bisi ngatur panggau pemerindang ari artis menua tu empu,” ku iya madah.