Produk inovasyen ‘Go Herbs Insect Repellent Gel’ ngalahka lebih 90 pemekit ari Sarawak
MIRI: Nembiak SMK Sungai Tapang, Kuching dipadu nyadi champion ba atur pengawa Anugerah Harta Intelek Negara (AHIN) 2018 lebuh sida iya menang ngaga ‘Go Herbs Insect Repellent Gel’, ke bulih puin ke pengabis besai diberi ulih raban juri, iya nya 241 ngalahka lebih ari 90 pemekit ari serata menua Sarawak.
Ba penuduk kedua dimenang ulih SMK St. Columba, Miri ti ngaga ‘Flexocintrex’ ke bulih 230 puin lalu ba penuduk ketiga, dimenang ulih SMK Lawas, Lawas enggau barang ke digaga sida iya ke dikumbai ‘Numbering Plate’ ke bulih 203 puin.
Ba kategori palan pelajar tinggi, Politeknik Kuching, Sarawak dipadu nyadi champion lebuh sida iya ngaga ‘Production of Smoke Muffler from Organic Waste’, ba penuduk kedua dimenang ulih Palan Latih Pengawa Industri (ILP) Miri ke ngaga ‘Tig Gun Feeder’ lalu ba penuduk ketiga dimenang ulih Poilteknik Mikah ke ngaga ‘Development Prototype of the Aquino Powered by Arduino.’
Atur pengawa nyuaka perais digaga di ILP kemari, alai direktor palan latih nya, Dr Rosnah Muhamad Tahir nyerumba pekit nya siti peluang ke manah ke bala nembiak sekula matih penemu sereta runding sida iya lalu mantaika pengelandik sida ngaga penyelai perengka guna nya.
“Aku bisi dipadah lebih ari 120 penyereta ari sekula sekondari enggau palan pelajar tinggi ari serata zon Sarawak bisi enggau pekit tu. Berita manah bansa tu sigi mer- ansang kitai semua, ke mandangka pengelandik sereta pengagit ati bala nembiak,” ku iya madah lebuh bejaku ba atur pengawa nya.
Produk ke digaga bala nembiak nya ku iya, ukai semina produk ke digaga ba pekit aja, tang produk ke udah menang tu diperatika tau nyadi perengka guna ke tau ngelantangka pengelantang pendiau mensia mayuh.
“Produk inovatif bansa tu ke digaga ulih penyereta, ukai semina nambah penyelai sereta penemu ke inovatif nembiak, pemerat barang bansa tu enda ulih dikira enggau wang ringgit. Nya alai, pengudah abis pekit tu, barang ke digaga ulih nembiak tu enda tau enda digagaka chuan (patent) ngambika enda diambi tauka dikena orang ke enda betanggungjawab.
“Ba belanja ngaga proses chuan tu, Opis Intellectual Property Corporation of Malaysia (MyIPO) bisi nyendiaka wang turu dalam penyampau RM500,000 tetiap taun ari 2016, alai wang tueu tu dikena mungkur ungkus ngaga chuan nya. Aku ngarapka sekula sereta palan pelajar tinggi deka ngena wang turu tu enggau manah, ngambika produk tu enda dikena ulih orang bukai ke ngambi ulih ba pengelandik kita,” ku Dr Rosnah, lalu nandu baru, wang turu tu agi ulih diambi datai ngagai taun 2020.
Dr Rosnah mega ngambi peluang nya muji Miri Young Inventor Technocrats (MyIT) ke udah bebendar endar gawa ngangkatka barang ti digaga sida iya sereta bejalaika pengawa inovasi nya di Miri.
Sama bisi enggau ngulu atur pengawa nya, Direktor Opis Dagang Dalam Menua, Koperasi enggau Pekara Bebeli Barang (KPDNKK) Menua, Datuk Stanley Tan; Sapit Penulung Pegawai Opis Pelajar pampang Miri, Alias Ngah; enggau Direktor MyIPO pampang Sarawak, Vincent Lejau.
Produk inovatif bansa tu ke digaga ulih penyereta, ukai semina nambah penyelai sereta penemu ke inovatif nembiak, pemerat barang bansa tu enda ulih dikira enggau wang ringgit. Nya alai, pengudah abis pekit tu, barang ke digaga ulih nembiak tu enda tau enda digagaka chuan (patent) ngambika enda diambi tauka dikena orang ke enda betanggungjawab. Dr. Rosnah Muhamad Tahir Direktor OLP Miri