Kaban Kunsil Nengeri GPS setuju enggau agih belanja diberi ngagai ADUN PH
MUKAH: Agih belanja ti mega deka diberi ngagai pengari rayat Kaban Kunsil Nengeri (ADUN) Pakatan Harapan (PH) nerima timbal manah ari bemacham raban.
Nitih ku ADUN Balingian Abdul Yakub Arbi, iya setujuka perambu nya.
“Pekara ti endang patut diberi (agih belanja), laban sida (ADUN PH) mega udah dipilih rayat,” ku iya madah ngagai Utusan Borneo lebuh ditanya penemu iya senentang pekara nya kemari.
Abdul Yakub ngaku madahka sigi amat ba tetiap atur pengawa endang begunaka belanja.
Ari belanja ti diagih, pengari rayat PH deka ulih bekenaka belanja nya lebuh ngatur pengawa sekalika gawaka rayat tauka lebuh ngatur pengawa enggau perintah.
ADUN Jemoreng Datuk Dr Juanda mega meri saut sama, setujuka pengawa ti deka dipejalaika perintah nengeri nya.
“Tu manah amat, pengu- dah tu nadai dalih enda ulih bejalaika kereja di renggat menua,” ku iya.
Ba lansa bukai, perambu nya meda diterima manah Sapit Ketuai Parti Keadilan Rakyat ( PKR) Pampang Mukah Abdul Jalil Bujang ti madahka tu nunda pengawa ti dipejalaika Perintah PH.
“Pengawa ti manah pulaika pemaik rayat, Gabungan Parti Sarawak (GPS) nitihka pematut udah bejalaika pengawa tu ari dulu suba,” ku iya.
Abdul Jalil madah tetiap ADUN PH mega dipilih rayat ti sama deka gawaka pemansang menua.
Nya kebuah sida patut nerima tetiap pemansang sebaka enggau sitak menua ti diarika GPS.
Taja pia, pengawa meri enggau bejalaika agih belanja patut digaga lurus.
Kebuah pia ngambika nadai pekara enda betul tauka limpang tau nyadi lalu rayat deka nerima pemaik.
Apin lama ke udah, ADUN PH bisi ngatur pejalai nemuai meri basa ngagai kepala Menteri Datuk Patinggi Abang Johari Tun Abang Johari Tun Abang Openg di Kompleks DUN lalu minta diberika Geran Projek Mit Menua Pesisir (MRP).
Pekara nya udah disetuju perintah nengeri tang pengawa ngemendar sereta penyampau agih belanja bedau terang dipadah.