Dua produk besai di nengeri tu nerima peminta ti tinggi ba makit kelimpah ari produk ke endang udah bisi
KUCHING: Opis Menteri Pemansang Industri enggau Orang Dagang deka ngemansangka dua produk besai iya nya gula apung enggau ikan tahai, ba nengeri tu.
Menteri iya ti mega Sapit Kepala Menteri, Datuk Amar Awang Tengah Ali Hasan madahka, kelimpah ari produk ke endang udah bisi, dua produk nya lebih agi gula apung bisi peminta ba makit.
“Opis menteri mega mekuh ngagai dua produk besai berengkah taun tu, iya nya gula apung enggau ikan tahai.
“Taja pia industri gula apung agi ngena chara lama. Nya alai, bisi pematut ngena chara teknologi moden dikena ngangkatka enggau naka ulih pengawa ngeluar tauka ngasilka gula apung.
“Ke tuju tu, opis menteri deka nempa kerejasama enggau sebuah instistusyen nengeri tu mansik chara ngeluar tauka ngasilka dikena nambahka asil.
“Nambahka nya, industri ikan tahai mega betapi enggau penanggul bekal ti kurang bemusim. Pengawa ngasilka tahai tu begunaka ikan laut masin bansa Tamban ke alai bekal enda meruan sereta bepanggai ngagai gaya hari enggau gaya kandang endur diatu,” ku iya seraya madahka opis menteri iya mega deka bejalaika pansik enggau bekaul dikena nentuka ikan Tamban chukup sereta semampai bisi.
Awang tengah mansutka perambu nya lebuh ti nyimpul jurai Opis Menteri Pemansang Industri enggau Orang Dagang ba Aum Kunsil Nengeri Ke-18 Hari Ke-7 ti diatur ba Komepleks Kunsil Nengeri ditu, kemari.
Nambahka nya lebuh ke ngenang orang dagang ke nyadi tulang belakang nengeri tu, iya madahka opis menteri nyendiaka mayuh bengkah program bantu ti nyengkaum disediaka ejensi bekaul enggau pemansang orang dagang.
Tu nyengkaum program pemansang kapasiti, pemansang produk sereta mayuh rentayan makit.
Opis Menteri mega mantu Orang Dagang Mit enggau Tengan Pemesai (PKS) ari aspek ngelaku enggau nyual produk ngambika ulih ngerembaika dagang ngagai market domestik enggau antarabansa.
Nitihku iya entara aktiviti ngelaku enggau nyual ke udah dipejalaika sereta disereta ulih opis menteri nyengkaum Program Brunei Consumer Fair 2018; Program International Energy Week ba BCCK; Program Himpunan Usahawan Bumiputera; Program LeFest Tour ba Stadium Perpaduan Sarawak; Program MIHAS; Business Mission ba Kaliman- tan Barat ti idatur ba Miri, Saratok, Meradong, Sibuti, Kuching enggau Lubok Antu sereta Program Roadshow Keusahawanan ke udah diatur di Bekenu, Gedong, Kapit, Lawas enggau Limbang, ti udah meri penguntung ngagai 1,353 iku orang dagang.
“Opis Menteri deka nerus- ka semua program nya dikena meri penguntung naggai raban bansa ke bedagang tauka bejual,” ku Awang tengah ti mega Menteri pemansang mengeri enggau Pengeraja Asal II.
Berebak enggau tu lebuh ke ngenang pasal penyulut Sarawak Corridor of Renewal Energy (SCORE), iya madahka, naka ke diatu SCORE mujur narit penyampau puku RM33.64 billion.
Ku iya, penyampau nya (RM33.64 billion) enda nyengkaum projek ke diperambu iya nya RM17 billon projek keluli enggau projek Methanol RM6 billion ke agi diperati tikas pemujur nya.
Tikas garis entara SCORE diatu dibesaika ari 7.07 million hektar (7,070,900 ikar) ngagai 10.4 million hektar (10,414,239 ikar) ti mungkur dua endur baru di bagi menua Miri enggau Limbang, ku iya.
Kelimpah ari nya Awang Tengah madahka naka Jun 2018, State Industrial Coordination Committee (ICC) udah ngemendarka empat (4) projek dibaruh Industrial Coordination Act (ICA) ti sepenyampau RM2.28 billion (produk elektronik enggau elektrik; produk asas logam, produk kayu enggau produk berasaskan kayu sereta Non Metalic Mineral Product).
“Projek tu dipelabaka nyendiaka urung 320 peluang gawa ba nengeri tu.
“Dalam timpuh ke sama, State ICC mega udah ngemendarka 8 projek ICC ti sepenyampau RM75.75 million, ti tebal agi bekaul servis, produk kayu enggau produk ti bepelasarka kayu, produk HDPE enggau kereban dalam rumahsereta ke bukai. Lima projek berega RM65 million agi dalam renggat diperundingka. Tu dipelabaka nempa urung 310 peluang gawa,” ku iya.
Sapit Kepala Menteri