RM3.266 bilion asil penatai pemisi ke udah digumpul naka setengah taun 2018
KUCHING: Penatai pemisi ke digumpul taun 2018 bisi RM3.266 bilion, ti urung 59 peratus ari anggar penatai pemisi taun tu ke sepenyampau RM5.525 bilion.
Bepelasarka asil nya, Menteri Wang II Dato Sri Wong Soon Koh arap bendar asil penatai pemisi ke ulih digumpul dipelabaka ngelui anggar penatai pemisi taun tu.
Iya madahka nyentuk ke tengah taun 2018, RM2.802 bilion belanja biasatauka 49 peratus ari penyampau ungkup belanja ke dikemendar RM5.781 bilion udah dipelanja lalu ari penyampaubelanja biasabisi RM1.152 dikena melanja operasyen sereta laluh RM1.650 bilion diungkupka ngagai Akaun Wang Turu Pemansang.
Lalu ungkup belanja pemansang, RM2.968 billion tauka 52 peratus ari ungkup belanja ninting taun ke udah dikemendarka bisi sepenyampau RM5.745 dipelanja dalam timpuh ke sama, ku iya seraya ngarapka belanja pemasang dipelabaka deka nyungkak bepelasarka aktivit ke diatur semanjai taun tu.
“Aku deka meransang semua ejensi ti bejalaika aktiviti ngambika lebih regas dikena ngenukuka program enggau projek ti dikemendarka dibaruh RMK11 lebih agi projek ke meri empas tinggi sereta meri bemacham empas ke manah dipejalaika enggau lengkas dikena meransang aktiviti ekonomi dalam nengeri,” ku iya.
Wong mansutka pekara nya lebuh ti nyimpul jurai Opis Menteri Wang ba Aum Kunsil Nengeri Ke-18 Hari Ke-7 ba Kompleks Kunsil Nengeri ditu, kemari.
Nambahka nya lebuhka penyerata kontraktor nengeri tu, iya madahka bisi dua kategori projek dipejalaika ba nengeri tu iya nya projek dipelanja perintah besai sereta projek dipelanja perintah nengeri.
Projek dipelanja Perintah Besai enda tau enda senipak enggau prosedur utai ke diulih Besai, lalu projek dipelanja perintah nengeri senipak enggau prosedur diulih perintah nengeri.
“Ungkup projek dipelanja Perintah Besai, siti pekara ke diguna perintah besai iya nya kunteriktor enda tau enda direjista enggau Construction Industry Development Board (CIDB) sereta ngembuan Sijil Perolehan Kerja Kerajaan (SPKK) sebedau dikemendarka nyereta sebarang tinda Perintah Besai.
“Lalu ungkup projek dipelanja perintah nengeri, siti ari pinta mandatoriperintah nengeri ke alai kunteriktor enda tau enda direjista enggau Unit Pendaftaran Kontraktor Juruperunding (UPKJ) sebedau sida dikemendar nyereta sebarang tinda perintah nengeri.
“Perintah nengeri enda kala enda ibuhka nengeri tu enggau lisin UPKJ,” ku iya.
Nambahka nya iya madahka perintah besai udah setuju enggau peminta perintah nengeri ngambika ngemendarka kunteriktor nengeri tu enggau lisin UPKJ ngambi bagi dalam projek ti dipelanja perintah besai ke enda dikemendarka sebedau tu.
Lebuh ke nyimpul jaku, Wong madahka beguna amat perintah nengeri ngatur belanja enggau penuh tanggungpengawa sereta bejimat dikena nentuka penegap wang sereta nyukung agenda pemansang ekonomi.