Perintah PH dikearap neruska agih belanja ungkup nyukat tanah NCR
KUCHING: Perintah besai Pakatan Harapan ( PH) dikearapka ulih neruska pengawa meri ungkup belanja dikena bejalaika pengawa nyukat perimeter di baruh Program Nyukat Tanah Adat Bansa Asal (NCR) Inisiatif Baru.
Sapit Kepala Menteri ti mega Menteri Pemansang Mengeri enggau Pengeraja Asal, Datuk Amar Awang Tengah Ali Hasan madahka, program nya dipejalaika kenyau Oktober 2010 ngena ungkup belanja ari perintah besai ti diberi nengah Program Khas Bumiputera ungkup Sabah enggau Sarawak
Lalu kenyau di dipejalaika ku iya, sepenyampau RM154.5 juta udah diungkupka. Lalu ba Langgur Pemansang Malaysia Lumpar Ke-11 aja sepenyampau RM90 juta udah dikemendarka sereta naka ke diatu urung RM50 juta udah diungkupka.
Nitihku iya program nya dipejalaika nengah dua renggat iya nya nyukat perimeter enggau renggat kedua nyukat lot individu.
“Aku ngarapka perintah besai deka neruska pengawa ngungkupka belanja dikena nerusaka program tu (nyukat perimeter di baruh Program Nyukat Tanah NCR Inisiatif Baru).
“Ba renggat keterubah, pengawa nyukat perimeter dipejalaika dikena meri gazet (mewartakan)endur nya nyadi Rizab Komunal (Pengawa Betanam Betupi) Bumiputera di baruh Seksyen Kanun Tanah Negeri.
“Naka Jun 2018, sepemesai 861,136 hektar (2,127,868 ekar) udah mujur disukat perimeter. Ari penyampau nya, sepemesai 677,114 hektar ( 1,673,149 ekar) di serata Sarawak udah digazet(diwartakan),” ku iya.
Awang Tengah mansutka pekara nya lebuh ti nyimpul jurai Opis Menteri Pemansang Mengeri enggau Pengeraja Asal ba Aum Kunsil Nengeri Ke- 18 Hari Ke- 7 ba Kompleks Kunsil Nengeri ditu, kemari.
Bejaku baru iya madahka, ba renggat kedua program nya kandang endur di baruh Seksyen 6 nya deka disukat lot individu.
“Naka ke diatu, sepenyampau 21,810 lot indisvidu udah mujur disukat ti mungkur kandang endur sepemesai 27,407 hektar (67,722.73 ekar).
“Sepenyampau 9,461 lot sepemesai 10,512 hektar (25,974 ekar) udah diberi surat pala tanah di baruh Seksyen 18 Kanun Tanah Negeri,” ku iya.
Berebak enggau tu, Awang Tenggah minta semua piak lebih agi ke minta tanah NCR ngambika meri kerejasama penuh ngagai Opis Tanah enggau Survei (JTS).
Ku iya nya dikena nentuka pengawa nyukat nya ulih dipejalaika enggau lanchar lebih agi ti mungkur lot individu.
Kelimpah ari nya lebuh ke ngenang pasal nurunka penyampau premium tanah enggau mayar pulai baru premium tanah ungkup lot endur diau (lot kediaman), Awang Tengah madahka, perintah udah ngaga pemutus berengkah 6 Mei 2018 nurunka premium ngagai enda lebih RM2,500 ba tiap lot di semua Skim Penempatan Semula (SPS) enggau Skim Pembesaran Kampung (SPK) keelimpah ari Skim Penempatan Semula Demak Fasa 3, 4 enggau 6.
Lalu ku iya, sebarang bayar premium tanah ke udah dibayar ngelui RM2,500 ungkup lot ba SPS enggau SPK deka dibayar pulai baru, ke pengelantang pendiau rayat.
“Pengawa mayar pulai baru premium tanah tu deka mungkur pengempu asal, lot ti udah dipindah pengempu ngagai pemegai surat kuasa mentadbir enggau pindah ngempu ketegal pengasih dalam diri sebilik ke semak.
“Taja pia, pengawa mayar pulai baru lebih premium tu enda mungkur lot ti dipindah ngempu nengah pengawa bejual bebli tanah,” ku iya ti mega Menteri Pemansang Industri enggau Orang Dagang.
Pengempu tanah nya ku iya, patut ngenataika peminta mayar pulai lebih nya premium nya ngagai JTS.
“Peminta tu ulih dikenataika nyentuk Oktober taun baru iya nya 31 oktober 2019.
“Pemutus mayar pulai baru lebih (premium tu) deka meri empas wang tauka belanja ngagai Perintah ti dipelabaka sepenyampau RM43 juta sereta deka diasaika pemanah ulih 7,174 iku pengempu tanah.
“Tu ngayanka komitmen enggau pemendar Printah ti deka mantu pengempu tanah ba SPS enggau SPK ngulihka surat pala tanah ngena penyampau premium ti nitihka pengulih sida,” ku iya ti mega Menteri Pemansang Industri enggau Orang Dagang.