Sarawak ngerikod penambah ba rega dagang enggau menua ASEAN
KUCHING: Menteri Dagang Antarabansa enggau E-Dagang, Dato Sri Wong Soon Koh madahka Sarawak ngerikod penambah ba dagang menua ASEAN.
“Naka Mei 2018, rega dagang udah ngelui tikas RM6.1 billion, nambah 38.3 peratus dibandingka enggau RM4.4 bilion ba timpuh ke sama taun nyin kemari.
“Rega dagang nya baka Thailand sepenyampau RM1.8 billion; Indonesia (RM1.3 billion); Singapura ( RM1.3 billion); Vietnam ( RM0.9 billion); Filipina ( RM0.5 billion), Brunei Darussalam ( RM0.2 billion); Kemboja (RM9.6 juta); Myanmar (RM3.5 juta) enggau Lao People’s Democratic Republic sepenyampau RM235.1 ribu)
“Dalam pengeran kitai dekaka Sarawak nyadi bakih dagang ke dipilih, opis menteri kami terus bejalaika inisiatif ngelakuka enggau nambahka kaul enggau bakih dagang kami ke diatu,” ku iya.
Wong mansutka pekara nya lebuh nyimpul jurai Opis Menteri Dagang Antarabansa enggau E-Dagang ba Aum Kunsil Nengeri Ke-18 Hari Ke-7 ti diatur ba Kompleks Kunsil Nengeri ditu, kemari.
“Berebak enggau tu mega kami dekan ngiga market baru ti bisi nambahka penyampau dagang enggau ngerejista penumbuh dagang,” ku iya.
Bejaku baru iya madahka opis menteri deka mansik potensial betanam betupi, agro enggau akua ke ulih dijual tauka dieksport.
Beduduk ari pekara tu, kami ngelalu sereta meransang kompeni kitai ngambika berani agi ngasilka produk nya sekalika ngerembaika dagang tauka nengah kerejasama enggau kompeni menua luar ke tegap, ku iya.
Kelimpah ari nya Wong madahka opis menteri deka terus chakah ngelakuka pengawa dagang nengeri dikena nambahka penyampau dagang nengeri nengah chara regas ngambi bagi dalam pengawa pemandang dagang ti diatur renggat menua enggau antarabansa.
Entara objektif penyereta program baka nya dikena ngayanka produk Sarawak ke bisi potensial ngerembus makit dunya, numbuhka kaul entara perintah eng- gau perintah (G2G) sereta entara dagang enggau dagang ( B2B) sereta dikena nyerungkai enggau belajarka makit baru enggau teknologi dikena nambahka pemansut produk.
Objektif nya mega ku iya, dikena meri peluang ngagai orang dagang ngasaika dagang antarabansa sereta betukar penerang enggau komuniti dagang antarabansa.
“Dikena nentuka objektif nya ulih dijapai, Opis Menteri deka terus nempa kerejasama enggau ejensi ti bekaul baka Opis Menteri Pemansang Industri enggau Orang Dagang Sarawak; MITI, Malaysia; FAMA; LKIM; STIDC; SEDC enggau PMalaysian Handicraft Development Corporation.
“Nyentuk Jun 2018, Opis Menteri udah ngambi bagi dalam empat pengawa pemandang dagang di Kuala Lumpur iya nya Export Furniture Expo ( EFE); malaysia International Halal Showcase (MIHAS); Malaysia Online Business Expo (MOBE) enggau Malaysia International Food and Beverage Trade Fair (MIFB 2018),” ku Wong ti mega Menteri Wang II.