Orang dagang deka disedia perengkaguna ke chukup Baka nyendia internet bepeneras tinggi enggau teknologi baru sereta Digital Free Trade Zone (DFTZ)
KUCHING: Perintah Sarawak keran nyendiaka perengkaguna ke chukup ungkup pemaik orang dagang di nengeri tu.
Kepala Menteri Datuk Patinggi Abang Johari Tun Openg madah pekara nya mungkur atur nyendia internet bepeneras tinggi enggau teknologi baru.
“Perintah Sarawak iya nya Gabungan Parti Sarawak (GPS) beratka pekara tu ke alai kitai sigi ngembuan tuju ke baka tu.
‘Tuju tu meseti mai pemaik ngagai orang dagang, reti nya peranak Sarawak.
“Orang dagang kitai meseti disambung ngagai pemeli baikka nya di Semenanjung Malaysia, Asia, China, Korea, Jepun, Eropah enggau menua bukai,”ku iya.
Iya mansutka jaku nya rambau bejadi Borneo Entrepreneurship and Investment Convention (BEIC) 2018 di KTS Village ditu, kemari.
Dikena ngemujur pengeran nya, Abang Johari netapka perintah udah numbuh Digital Free Trade Zone (DFTZ) di Samajaya ditu.
Palan nya ku iya dikearap ulih nyendiaka kaul dagang entara orang dagang Sarawak ngagai orang dagang bukai baka ke Jack Ma (AliBaba).
“Palan tu (DTFZ) deka ngempuru produk orang dagang lalu ari nya deka dijual ke menua bukai.
“Ba sentang tu, pekara logistik chukup berat lalu ditu mih guna penerebai bilun (Air Asia) sereta kompeni logistik.
“Palan nyendiaka orang dagang kitai ngagai makit di menua luar,’ku iya.
Ngenang kaul ke sama, iya ngarap orang dagang Sarawak ulih nguna semua perengkaguna ke disedia perintah lalu ngena pengelandik sida ngatur kuing dagang diri.
Borneo Entrepreneur- ship and Investment Convention(BEIC) 2018 diatur SEE Hua Group nengah kerejasama Opis Menteri Industri enggau Pemansang Pengawa Dagang.
Bela datai Sapit Kepala Menteri Datuk Amar Awang Tengah Ali Hassan, Menteri Dagang Antarabansa enggau E-Dagang Dato Sri Wong Soon Koh sereta Managing Direktor KTS Group of Company Dato Henry Lau. KUCHING: Opis Kunsil Pengeraja Asal enggau Rampa Menua (NREB) matau semak gaya hari di Sarawak sebedau ngaga pemutus sekalika deka terus ngeluar tauka nginsil Permit Pembakaran Terbuka (OBP).
Kontroler Kualiti Rampa Menua Sarawak, Peter Sawal nyemetak madahka NREB bisi ngembuan penetap belalauka Standard Operating Procedure (SOP) ti dititih.
“Enti Indek Pengamah Agin ngelui ari 100 (ngeruga pengerai) lalu m ajak nadai ujan kandang beberapa hari, kitai enda ngeluarka OPB. Enti gaya hari majak rangkai (kemarau), kitai deka nginsil OBP ti udah dikeluar sebedau tu,” ku iya madah ngagai Borneo Post.
Peter Sawal madahka NREB enda beratika aktiviti pengawa nunu tu pekara ti lempung.
“Semua kes pengawa nunu deka dipansik opis kandang menua kami di Kuching, Betong, Sibu, Mukah, Bintulu, Miri enggau Limbang,” ku iya.
Ku iya, sida mega deka matau gaya nya ngena mata ari langit.
“(Ba sekeda kes, bisi) kandang menua ke alai titik angat ditemu kitai ari Satelit NOOA18,” ku iya.
Ku Peter, semua pengawa nunu ti ditemu satelit datai enggau koordinat Global Positioning System (GPS).
“Kitai deka nampal (koordinat) enggau kandang menua pemansang digital enggau rikod sebarang OBP ti dikeluarka Indu Opis (HQ) NREB,” ku iya nerang.
Naka diatu ku Peter madah nyemetak, sida nadai nerima sebarang gerah taja NREB agi matau gaya pekara ninting hari.
“Terima kasihka penerang. Opis kami di Betong deka ngabas endur nya (enti sida bedau kia),” ku iya, lebuh dipadah bisi penusah angus besai ti diripot nyadi di Genturung Pendiau Sebemban, Betong.
Seraya Kaban Kunsil Nengeri (ADUN) Saribas, Mohd Radzi Sitam ngenukuka penusah angus besai nyadi malam kemari enda jauh ari dua kebun sawit diempu kompeni peribit enggau kompeni ngaul perintah, enda entu jauh ari Genturung Pendiau Sebemban.
“Penerang ari peranak genturung pendiau ngagai aku (iya nya) kompeni nunu alai kebun baru. Nya dikereja kompeni ti enda ditemu kami nama. Tu enda entu jauh ari Genturung Pendiau Sebemban,” ku iya.