Sarawak Baru nyadi alternatif politik ngagai GPS, PH
KUCHING: Parti Tenaga Rakyat Sarawak ( Teras) enggau Parti Bansa Dayak Sarawak Baru (PBDSB) udah berengkah nguji numbuhka Sarawak Baru ke nyadi alternatif politik ngagai gempung Gabungan Parti Sarawak (GPS) enggau Pakatan Harapan (PH) di nengeri tu.
Ensanus Sekretari Besai Teras ke mega eksekutif sekretari Banyi Beriak enggau presiden PBDSB, Cobbold John udah betemu sereta berandauka sekeda pekara numbuhka Sarawak Baru.
Banyi lebuh ke dikangau nengah telefon madahka seduai iya Cobbold benung ngaga utai ti dikumbai “fokus ba runding” enggau “singkang keterubah nuju gempung ke manah “lebuh ti madahka pasal randau seduai iya.
“Fokus ba runding” Teras enggau PBDSB.
“Singkang keterubah nuju gempung ke manah “, Sarawak Baru,” ku Banyi.
Ku Banyi, randau nya diatur berindik ari penerang berita Mandal Presiden Parti Pesaka Bumiputera Bersatu (PBB) Dr Annuar Rapaee kena Hari Tiga tu tadi ti madahka GPS semina deka berunding mai sida pengudah GPS udah berakup enggau ex- parti komponen Barisan Nasional (BN) Sarawak.
Iya madahka penerang ti dipansutka Dr Annuar nya ngenasalka politik laban dalam struktur GPS semina mungkur PBB, Sarawak United People’s Party (SUPP), Parti Rakyat Sarawak (PRS) enggau Parti Progresif Demokratik ( PDP), ke semina eksklusif.
Ku iya, penumbuh enggau kuing politik GPS n adai bebida enggau BN Sarawak ke dikeenggaika sida pengudah BN alah lalu Putrajaya dipegai PH maya pengawa bepilih besai kena 9 Mei 2018.
“Kami m eri t erima kasih ngagai YB Annuar Rapaee laban udah mantaika penemu nya. Dikena ngepunka nya Teras, PBDSB, STAR (tauka Parti Reformasi Sarawak) lalu ngarapka parti bukai di nengeri Sarawak ke sebaka runding enggau kami, fokus enggau kami numbuhka Sarawak Baru, entiti baru enggau pengarap baru ngagai rayat Sarawak,” ku iya.
Kelimpah ari nya, siti agi parti di negeri tu ke enda dibai dalam gempung GPS iya nya United People’s Party (UPP).
Presiden UPP Dato Sri Wong Soon Koh, ngenukuka parti nya talukka GPS lebuh iya madah munyi nya ba Aum Kunsil Nengeri (DUN).
Teras, PBDSB enggau STAR udah berengkah enggau penemu numbuhka Sarawak Baru ba aum pengarang birita minggu nyin tadi. Diberitaka logo ti bechura menira Nengeri Sarawak nyadi simbol Sarawak Baru, udah tembu digaga.
Teras nadai kala enggau bepilih be sebarang pengawa bepilih kenya ditumbuhka dalam taun 2013 tang PBDSB udah suah enggau bepilih.