GPS dikelala sereta diterima mensia mayuh
KUCHING: Semua pekara ke bekaul enggau atur ngerejista Gabungan Parti Sarawak (GPS) deka ditukuka manggai bulan baru tu.
Kepala Menteri Datuk Patinggi Abang Johari Tun Openg madah iya berasai gaga diatu taja pan GPS bedau direjista, tang udah dikelala mensia mayuh.
“Tajapan kitai mengkang dalam proses ngerejista GPS, aku pechaya semua deka ditukuka ba bulan baru tu.
“Siti pekara ke dipeda aku, taja benung ba atur ngerejista GPS, semua udah nerima GPS lalu mandangka kitai tu GPS,’ku iya.
Iya mansutka jaku nya ba Makai Lemai Kelab Penyukung Sarawak ( SBBC) enggau Gawai 2018 ke bela digulu Chairman SBBC Paulus Palu Gumbang ditu, malam ensanus.
Nambahka nya ku Abang Johari, ba renggat parlimen kaban GPS pan udah diterima enggau manah.
“Ba Parlimen sida (Kaban Parlimen) bisi ‘blok khas’ ungkup GPS, lalu nya mandangka Parlimen pan meri basa ngagai GPS,” ku iya.
Ku iya, pengudah atur ngerejista GPS tembu, pen- gawa ngelaku GPS deka dipejalaika.
Pengawa nya ku iya meseti dipejalaika semua kaban gempung ngambi ulih ngenegap GPS ti bechairmanka parti Sarawak empu.
“Nangkanka nya kitai deka nampung pengawa ngemansang negeri tu.
“Nengah chara ngintu asil nengeri enggau Bank Pemansang Sarawak (DBOS), kitai nadai napi penanggul ba pekara belanja dikena ngemansang nengeri.
“Nengah chara nya, aku pechaya kitai ulih ngamatka semaya ngagai rayat,”ku iya.
Ngenang sentang SBBC, iya muji bala kaban gempung ti udah ngambi bagi ba debate enggau manah sekumbang aum DUN.
Serak tu ku Abang Johari, sida udah ngaga pansik enggau manah, nyangkal sereta nimbal enggau manah isu ke dibai raban penyakal.
Bela datai sapit kepala menteri Datuk Amar Douglas Uggah Embas enggau Tan Sri Datuk Amar James Masing, Speaker DUN Datuk Amar Mohd Asfia Awang Nassar enggau menteri kabinet bukai sereta bala ADUN GPS.