Bisi 3,929 RTP udah tembu dipejalaika di serata nengeri
KUCHING: Naka 30 Jun 2018, sepenyampau 3,929 ari semua 4,836 Projek Transformasi Menua Pesisir (RTP) ti dikemendar di serata nengeri tu, udah tembu dipejalaika.
Sapit Kepala Menteri ti mega Menteri Betanam Betupi Moden, Tanah Adat enggau Pemansang Kandang Menua, Datuk Amar Douglas Uggah Embas madah, RTP ke dipejalaika perintah nya dikena mantu ngangkatka infrastruktur enggau perengkaguna fizikal ba kandang menua pesisir.
Ku iya, perintah ngungkupka belanja sepenyampau RM1.54 billion dalam timpuh 2015 ngagai 2017 dikena bejalaika 4,836 projek RTP di serata nengeri tu.
Dibagi nitihka taun, ba taun 2015 ari penyampau 1,853 projek ti dikemendarka biai 1,812 projek tauka 97.8 peratus udah tembu; ba taun 2016 ari penyampau 1,346 projek ti dikemendarka bisi 1,236 projek tauka 91.8 peratus udah tembu, lalu ba taun 2017 ari penyampau 1,637 projek ti dikemendarka bisi 881 projek tauka 53.8 peratus udah tembu.
“Naka 30 Jun 2018, bisi 3,929 projek RTP tauka 81.2 peratus udah tembu ari penyampau semua (4,836) projek nya, lalu lebih 907 projek agi dalam mayuh renggat dipejalaika.
“Bekaul enggau isu projek RTP ti ditangguh, kitai perintah ngaku endang bisi pengelemi ba projek RTP. Antara pengelemi iya nya penyuah ba ubah projek nya.
“Naka ke diatu, bisi 2,168 projek tauka 45 peratus ari 4,836 projek nya ke berubah ba skop, ungkus enggau palan projek,” ku iya.
Uggah mansutka pekara nya lebuh iya ti nyimpul jurai Opis Menteri Betanam Betupi Moden, Tanah Adat enggau Pemansang Kandang Menua ba Aum Kunsil Nengeri Ke-18 tu tadi ti diatur ba Kompleks Kunsil Nengeri ditu.
“Beduduk ari pengelemi nya, perintah bejalaika sekeda inisiatif dikena ngenegap nusun pengawa RTP, ti nyengkaum ngaga tauka ngatur baru sekeda Standard Operating Procedures (SOP),” ku iya.
Antara inisiatif enggau atur baru SOP baka numbuhka Unit RTP ba Opis Bagi Menua JKR nyengkaum ‘Unit RTP with Design Function’ ba tiga Bagi Menua besai (Kuching, Sibu enggau Miri) sereta ‘RTP Unit without Design Function’ ba Bagi Menua bukai.
Nambahka pemayuh pengereja pengawa teknikal JKR sekalika ba opis renggat bagi menua enggau pelilih menua, dikena ngenegapka agi kapasiti ba opis nya, ku iya.
Inisiatif ke bukai nyengkaum nikika kuasa Kaunsil Tinda Divisyen ari RM500,000 ngagai RM2 milion dikena ngemujurka proses ngulih ungkup projek RTP; meri kuasa pengari ngagai Komiti Raban Divisyen ngambika raban nya ulih meri pemendar; meri kuasa pengari ngagai peranak ngemendarka ubah projek ke nadai mungkur nambahka penyampau ungkup belanja projek kelimpah ari ngatur aum pematau ke suah sereta nemuai ngabas palan dipejalaika State Implementation Monitoring Unit ( SIMU) ngambika nemu pejalai projek.
Kelimpah ari nya,Uggah madahka kualiti projek RTP mega dikemeratka ke alai Komiti Audit deka ditumbuhka awakka ulih suah agi matau enggau audit proses kereja enggau pemutus nentuka Tusun Pengawa Korporat ke manah dititihka.
“Aku minta semua Kaban Kunsil Nengeri mantu matau enggau chara meri timbal ngagai komiti nya.
“Dikena nentuka pengelanchar sereta pejalai projek RTP lebih sistematik, aku mega minta sereta meransang Kaban Kunsil Nengeri ngambi berundingka langkar projek ke diperambu nengah chara numbuhka projek bank ba sitak diri empu sereta ngemimitka ubah ngagai projek ke udah dikemendarka,” ku iya.