Danji PRU PH deka dikeamat Perintah Pakatan Harapan ukai semina ngamatka semua semaya nya aja tang mega nguji ngaduka baru tusun pengawa perintah: Tun M
KUALA LUMPUR: Perintah bepegai ba danji ke udah dipekat dalam manifesto pengawa bepilih besai ke-14 lalu bebendar ngamatka nya, ku Menteri Besai Tun Dr Mahathir Mohamad.
Iya taja pia madah fokus perintah Pakatan Harapan (PH) ukai semina ngamatka danji-danji nya aja tang mega nguji ngaduka baru tusun pengawa perintah.
“Dalam timpuh 100 hari tu mega mayuh pengawa patut digaga perintah. Iya kedikemerat iya nya meresi perintah ari pengamah bekau ari ulah makai suap enggau salah guna kuasa ke nuntung raban perintah suba,” ku Dr Mahathir ba sesi tanya saut nyerumba Aum Dewan Rakyat kemari.
Kenu ku iya, pengawa tu digaga entara iya nengah atur undang-undang bekaul enggau penyalah ke ditemu dalam perintah, pengawa nyidi enggau ngambi baru duit ke endang enggi perintah ti lenyau, nusun baru opis enggau ke bukai.
Berebak enggau nya, Menteri Besai madah opis enggau ejensi perintah mega benung beratika timbal pejalai danji-danji nya ngambika iya ulih dipejalai enggau lanchar sereta bepelasarka undang- undang.
Berati ngagai 10 danji 100 Hari ke digaga PH nyerumba PRU14, Dr Mahathir madah pengawa bejalaika nya udah digaga tang asil iya enda semua ulih dijalai dalam timpuh 100 hari dikena nentuka danji-danji nya ulih dipejalai enggau lanchar sereta bepelasarka undang-undang.
Ku iya, pengudah 70 hari PH numbuhka perintah baru kenyau Mei tu tadi, dua ari 10 danji udah dikeamat, enam agi dalam proses digaga lalu dua agi bedau dipejalai.
“Perintah sigi bebendar ngamatka semua danji nya bepelasarka polisi ‘accountability’ kami ngagai rayat,” ku Dr Mahathir.
Chunto iya, Opis Menteri Pemansang Orang Indu, Ruang Bilik enggau Raban Bansa benung bejalaika bayar Wang Turu Pengereja Pengawa (KWSP) ungkup bini ti nyaga rumah.
Danji ke nadai nyengkaum ungkus mega udah dipejalai baka meresi nama sida ke udah ‘black list’ ba Opis Wang Turu Pelajar Tinggi Nasional (PTPTN), ku iya.
Nyaut tanya Fong Kui Lun (PH-Bukit Bintang) bekaul enggau atur matau danjidanji nya, menteri besai meri jamin perintah deka ngamatka nya.
“Kitai sigi enda ngelak utai nya nadai dipatau ketegal pengawa- pengawa bukai laban kitai endang bepanggai ngagai danji-danji dalam manifesto,” ku iya.
Dr Mahathir madah, tu nyengkaum ngamatka danji meri royalti 20 peratus ngagai nengeri pengeluar petroleum ba menua tu.
“Kami bedanji deka meri royalti baka ke udah disemaya suba, sigi nadai besibil ba pengawa tu.
“Tang kami ngarap royalti tu dikena ke pemaik nengerinengeri nya laku ukai disalah guna dikena ngenegapka parti enggau pekara bukai,” ku iya maya nyaut tanya tambah ari Siti Zailah Mohd Yusoff (PAS-Rantau Panjang).
Dr Mahathir nandu penerang iya nya manifesto pengawa bepilih besai PH ukai bup kudus, tang siti dokumen ti kelalu nanchang perintah bejalaika danji-danji nya.
“Aku ta nemu kaban Yang Berhormat (Rembau) ngumbai manifesto nya bup kudus. Tang enti amat iya ngumbai baka nya, kami ba sepiak tu ngumbai iya endang manifesto, ukai nanchang kitai sampai enda ulih nyingkang.
“Kami enda ngumbai manifesto tu Quran tauka Bible. Nyadi maya kitai datai ba penanggul, kitai patut ngiga jalai mutarka iya,” ku iya nimbal penerang dipansutka Khairy Jamaluddin (BN-Rembau) ba aum Dewan Rayat kemari.
Ngelansa silik, Mahathir madah maya perinta nguji bejalaika manifesto nya, bisi penanggul nyengkaum undang-undang lama ke nekul pejalai nya. — Bernama
Dalam timpuh 100 hari tu mega mayuh pengawa patut digaga perintah. Iya kedikemerat iya nya meresi perintah ari pengamah bekau ari ulah makai suap enggau salah guna kuasa ke nuntung raban perintah suba. Tun Dr Mahathir Mohamad Menteri Besai Malaysia