Ngambika proses pengawa ngajar ti bisi kualiti sereta kreatif ulih ditempa lalu ukai semina mekuh ngagai aspek fizikal aja
MIRI: Aspek inovasyen patut dikemerat dikena nyungkak pedagogi belajar abad ke-21 ba proses nempa pengawa ngajar ti bisi kualiti lalu ukai nya semina mekuh ngagai aspek perengkaguna fizikal aja.
Direktor Palan Pengawa Mansik, Pemansang enggau Inovasyen ( PPPI) Institut Pelajar Pengajar Malaysia Dr. Mohd Nasrudin Basar madah, inovasyen iya nya siti idea, pengawa ti digaga tauka perengka ke tau disebut baru lalu manah agi.
“Nya (inovasyen) digaga orang ti kreatif ke ulih ngadaka trend ke baru diatu sereta ngena awak ke bisi enggau naka ulih taja pan dalam ekosistem ti mayuh pekara enggau besemekih, nyengkaum bala pengajar.
“Pia mega tanggungpengawa pengajar sekalika pengajar di sekula tauka pengelicha, bisi tanggngpengawa ke berat dikena ngiri inovasyen sereta kreativiti dalam pengawa ngajar sida,” ku iya nerang.
Nyadi orang ti mai penemu, raban pengajar patut ngembuan pengelandik ti tinggi dikena ngaga transformasyen lebuh ti ngansah runding nembiak ngambika dinamik agi.
Nasrudin madah munyi nya ba pengawa bejadi ‘Licha Pengawa Mansik enggau Inovasyen dalam Pelajar 2018’ ( SpeDIP 2018). ke diatur Komiti Pengari Nembiak (JPP) Palan Pematih Pengajar Kampus Sarawak (IPGKS) Miri enggau kerejasama Jabatan Penyelidiakan dan Inovasi Profesionalisme Keguruan serta Program Sokongan Pensarjanaan Pensyarah (PROSPEN) IPGKS ke digaga ditu, kilah ensana.
Sama bisi datai iya nya Direktor IPGKS Gumbang Pura, Mandal Direktor Unit Pengatur enggau Pengawa Mansik Polisi Pelajar Opis Menteri Pelajar Malaysia Dr. Ahmad Rafee Che Kassim, Profesor Madya Fakulti Psikologi enggau Pelajar Universiti Malaysia Sabah Dr. Mohd Zaki Ishak, Chairman Seminar SpeDIP 2018 Chai Xin Ni sereta temuai dipebasa ke bukai.
Kelimpah ari nya, ku Nasrudin, pelajar abad ke- 21 patut bepelasarka elemen 4C iya nya ‘Critical Thinking’, ‘Communication’, ‘Collaboration’ sereta ‘Creativity’ dalam pengawa ti deka nyapai kualiti pelajar.
“Engkeman enggau rambai jaku iya nya Pengawa Mansik enggau Belajar Abad Ke-21 ( PAK21), transformasyen pelajar patut bepun enggau pengajar iya nya patut nemu tanggngpengawa diri, ulah ti positif enggau pengandal ti deka ngiri penemu sereta pengelandik diri, kelimpah ari bepelasarka elemen 4C,” ku iya.
Tambah iya agi, strategi enggau ransing ngaga pengawa nya endang patut dalam nentuka pengawa pengajar pelatih ke ulih ngisi pematut kemaya hari dalam kelas.
Dulu agi ari nya, dalam jaku lalau Chai madahka seminar ti digaga pengelama tiga hari berunggu nya ke berengkah ari 18 Julai deka dipejalai nyentukka saritu (Hari Lima) iya nya dikena ngadaka graduet pengajar ti ulih bejalaika pengawa mansik lalu bekunsika asil pansik dalam gaya meri licha.
Kelimpah ari nya, nya mega dikena mantaika inovasyen ke ulih ngiri pengandal pengajar pelatih ngagai pengawa inovasyen dalam kelas.
“Nengah program tu, kitai udah mujur ngempuruka 51 artikel, sebuah inovasyen pedagogi enggau enam buah inovasyen muzik nengah penyereta 322 iku nyengkaum 113 iku pengelicha ari Sarawak, Sabah enggau Selangor,” ku iya.