KGBS enda setuju modul PKJR dipasukka dalam subjek BM sekula primari
SIBU: Gempung Pengajar Bumiputera Sarawak (KGBS) endang enda setujuka perambu ti deka ngemasukka modul Pelajar Pengelikun Jalai Alun (PKJR) ngagai subjek Jaku Melayu (BM) sekula primari ba taun 2019.
Sapit Kepala Menteri Tan Sri Datuk Amar Dr James Jemut Masing lebuh ba pengawa nyimpul jurai jaku iya maya aum Kunsil Nengeri (DUN) bedau lama bisi madahka modul nya ke nyengkaum gambar, kod jalai besai enggau lalau pengelikun diperambu deka diajar dua kaliv seminggu dikena matih pengajar pengelikun jalai alun ba 1,264 sekula primari selampur Sarawak.
Ku Presiden KGBS Ahmad Malie madah, sida enda setujuka pekara nya laban nya deka nambahka pengawa pengajar dalam sesi pengawa ngajar enggau belajar (PDP) ke modul tu.
“Isu ke dulu agi ari tu iya nya ngatur baru pengajar bedau agi diputar. Lalu diatu, ka nambah baru tating pengawa pengajar enggau nambahka modul ke deka diajar ngagai nembiak.
“Nyema YB keran dekaka modul nya diajar ba tikas sekula primari, KGBS meri buah runding iya nya chukup mih nyema modul nya diajar dalam kurikulum ba sebarang subjek enti pelajar nya bisi kait enggau pelajar dalam sebarang subjek ke diajar pengajar pengelikun jalai laun,” ku iya lebuhka dikerandau kemari.
Ku iya nandu, KGBS nadai meda pekara nya nyadi isu ke besai lalu berat ungkup nembiak sekula kelebih agi sekula primari.
Beserimbai enggau nya, Ahmad madahka manah agi modul nya diajar sereta dikemerat ba palan belajar deriba laban palan tu ke endang mekuh ngagai pekara pengelikun jalai alun.
Ba pengujung randau, iya ngelalau sebarang piak enda patut meri sebarang buah runding bekaul modul ke diajar di sekula enti nadai pansik ke holistik sereta komprehensif enggau orang ti landik dalam bidang pelajar.
“KGBS nyemetak sentang pekara nya laban tiap perambu nya terus meri empas ngagai raban pengajar,” ku Ahmad.