Dua hari seminggu bejaku BM, BI di sekula patut ditambah

SIBU: Menteri Pelajar, Dr Maszlee Malik merambu ngagihka dua hari seminggu ngena Jaku Malaysia (BM) tauka Jaku English nyadi pengawa ti manah dikena meransang bejaku ngena jaku BM tauka English.

Ba jaku dipansutka Ketuai Pemesai Eksekutif ( CEO) Eaton International School, Datuk Felician Teo, taja pia, beratika pekara tu nyangka enda chukup ngagai bala nembiak sekula nelebaka sida bejaku BM tauka English.

“Sebarang jaku dikena begunaka penyuah enti ukai dikena besehari sehari ngambika landik. Landik bejaku begunaka nembiak sekula berunding dalam jaku nya nentuka sida ulih lanchar nyebut.

“Bala nembiak ti bejaku dalam BM tauka English tetiap hari deka bisi pengandal dalam diri dikena mantai tauka berandau ngena jaku nya,” ku iya lebuhka dirandau kemari.

Berebak enggau nya, beguna mega bala pengajar landik bejaku BM tauka English ngagai bala nembiak sekula, ku Teo nambah.

Iya nyemetak madahka kunchi ngambika landik bejaku iya nya mending.

“Bala nembiak deka nang- kap gaya nyebut, nya kebuah beguna amat bala pengajar landik bejaku ba jaku tu,” ku iya.

Teo udah dipinta ngelansa pasal perambu Maszle ke alai sekula patut bisi dua hari dalam seminggu ke alai semina BM enggau English aja dikena berandau ngambika nyaup bala nembiak ngansah pengelandik sida bejaku.

Nitih ku Maszlee, pekara tu patut dipanjai ngagai sekula nasional, sekula peribit, sekula bantu perintah tauka sekula bansa nasional ari milih hari ti patut dalam seminggu, netapka sehari ungkup tetiap jaku nya.