PPBM Sarawak bisi dua komiti pemungkal?

KUCHING: Ketuai Pemungkal Parti Pribumi Bersatu Malaysia (PPBM) Sarawak Shariff Busrah enggai nerima penuduk nyadi Sapit Chairman Komiti Pemungkal PPBM Sarawak ti betuaika Johan Mohamad.

Iya nulak diberi penuduk Sapit Chairman laban beratika komiti protem ti ditumbuh nya lebih ngagai pemerat politik deka nyadi chalun ba Pengawa Bepilih Negeri Ke12 (PRN-12).

“Aku enda ngining penuduk nya, aku lebih fokus ngagai pemansang rayat Sarawak nengah PPBM. Agenda sida semina deka nyadi chalun PRN12,” ku iya lebuh dirandau kemari.

Pia mega, Shariff madah aum ke diatu nya enda sah nitihka undang-undang parti.

Iya madah, sesebengkah aum patut betanya sereta minta pemendar rasmi ari Kaunsil Ketuai Besai.

Tandu iya, pengari parti ari komiti besai mega patut bisi datai ngemata sereta ngenuku ke aum.

“Ungkup aum milih Komiti Penyambung Nengeri, patut bisi digulu pengari ari genap pampang enggau milih komiti patut digaga nengah sistem undi ari pengari pampang,” ku iya.

Nitih penerang, Shariff agi ba Kuala Lumpur pengudah betemu enggau Menteri Besai Tun Dr Mahathir Mohamad ke mega Presiden PPBM kena 18 Julai tu tadi.

Berebak enggau nya, Johan ba aum media nya madah piak sida udah madah ngagai Shariff pasal aum penumbuh Komiti pemungkal PPBM Sarawak.

“Shariff mega udah dikangau ngagai gerup nya laban deka numbuhka Komiti Pemungkal PPBM Sarawak laban kitai udah nerima gerah lalu iya disengkaum dalam komiti protem tu dipadu nyadi Sapit Chairman.

“Kitai berandau enggau iya lalu iya mega bisi tim iya empu ke deka begempung dalam komiti tu,” ku iya.

Kenu ku iya, iya udah diberi mandat ari Indu Opis PPBM Besai ngemujurka juluk PPBM dibuka ba nengeri tu.

“Komiti pemungkal udah ditumbuh lali kitai udah diasuh bejalai lengkas milih komiti protem pampang enggau pating kitai ngambi dianjung ngagai komiti besai awakka tau bulih surat rasmi nyadi presiden parti.

“Kitai deka nyingkang jampat laban kitai semina diberi timpuh dua bulan ngemujurk apengawa tu, nyadi kitai deka bebendar gawa ke pemaik parti,” ku iya.

Johan madah piak sida nyelinting deka ngambi urung 31,000 iku kaban ba 31 penuduk parlimen sebedau bulan September ila lalu pengerami bejadika parti PPBM ba nengeri tu disadang deka dipenyadika Tun Mahathir.

Komiti Pemungkal PPBM Sarawak iya nya Johan nyadi chairman, Shariff enggau Dr Bidin Chee Kifli dipilih nyadi Sapit Chairman Ikram Yan, Abang Ahmad Abang Suni enggau Henry Simon dipilih nyadi Mandal Chairman.

Sekretari iya dipegai Hussaini Bujang enggau pemantu iya Hasni Khlaik, Tukang Wang Darmadi Shahminan enggau pemantu iya Awang Kasumar Awang Salleh enggau Ketuai Pemadah iya nya Zakaria Bujang.