PPBM Sarawak udah mujur ngerejista 27,696 iku kaban

KUCHING: Parti Peribumi Bersatu Malaysia (PPBM) Sarawak madah udah ngerejista kaban urung 27,696 iku lalu penyampau nya mandangka parti nya udah rasmi ba nengeri tu.

Ketuai Pemungkal PPBM Sarawak, Shariff Busrah madah, statistik nya nyemetak mandangka parti nya nerima sukung prositif ari rayat nengeri tu.

“Aku ngenukuka urung 27, 696 iku kaban PPBM ke bisi ba jari aku...Tu siti berita ke chukup manah lalu kami deka terus bejalai sereta fokus nambahka penyampau kaban ninting hari.

“Siti timbal ke manah ari rayat asal di Sarawak ke udah masuk PPBM. Aku deka nyuaka penyereta ke bisi tu awak ke direjister ba renggat besai,” ku iya nengah sebengkah penerang media dipansutka kemari.

Shariff madah, piak sida udah nyendaika siti Palan Servis PPBM ungkup komuniti di Sarawak lalu iya deka dipenyadika enda lama agi.

Kenu ku iya, iya deka mangku tanggungpengawa sereta pengarap ke udah diberi nya enggau manah.

“Kitai endang udah sedia enggau penuh, tang ukai fokus ngagai chalun ke deka bediri napi Pengawa Bepilih Nengeri Sarawak Ke- 12, Pekara nya dilempai aku ngagai pemintar ketuai renggat atas.

“Nyema nyadi, engka enda penuh 82 penuduk Kunsil Nengeri ( DUN). Aku berundingka ulah ke lebih silik ba pekara nya. Kitai meseti belajar ari bakih parti gempung Pakatan Harapan (PH) ke bisi ba Sarawak iya nya Parti Keadilan Raky- at, Parti Amanah Negara (Amanah) enggau Parti Tindakan Demokratik (DAP),” ku iya.

Iya andal rayat Sarawak deka meri timbal enggau manah lebuh bisi ulah “ngibuhka rayat” lalu nimbang pemansang ke dikeingin komuniti laban nya endang pemansang baru ungkup rayat Sarawak.

Shariff berebak enggau nya madah, piak iya deka seruran meri kerjasama ngagai piak media tang enggai kiruh ngagai sekeda orang ti nguna media nyadi ‘pengachau’.

“Aku nitih jaku ari Tun Dr Mahathir Mohamad (Presiden PPBM), perintah PH ngemeranak ulah tebuka lalu nadai betagang ngagai raban media.

“Ba aku piak meda patut diberi penuduk dikena mantu pengerambai PPBM ba Sarawak. Enda ibuh ngembuan ulah kelalu diau diri, anang takut tauka belalai ari rayat Sarawak pasal pejalai PPBM Sarawak diatu,” ku iya.

“Kitai udah mutus ati lalu meseti berani ngena rayat renggat baruh nyema bisi ulah ‘enda adil’ kitaid eka berunding baru ungkup rayat Sarawak,” ku iya.