Program dalam jaku English patut mayuh diatur di sekula
KUCHING: Program dalam Jaku English ungkup nembiak sekula patut mayuh agi diatur nyengkaum drama, dikena ngangkatka pengelandik enggau pemerani bejaku di mua orang mayuh.
Menteri Pelajar, Sains enggau Pemansik Teknologi, Dato Sri Michael Manyin Jawong madahka, nengah pekit drama ngena Jaku English mega ulih nambahka pengelandik enggau penau nembiak sekula ngena jaku nya setipak enggau juluk nyadika jaku nya jaku dikemeratka.
Tambah mega ku iya, dikena berandau enggau pangan diri serata dunya tebal agi ti ngena Jaku English.
“Kitai ngarapka mayuh agi prorgam baka tu (pekit drama) diatur, laban kitai nguji deka ngemanah sereta ngangkatka pengelandik enggau pemandai nembiak ngena Jaku English.
“Baka nengah pekit tu, nembiak ulih belajar ngangkatka pengelandik sida becherita ngena Jaku English, seraya ulih melabaka nama utai ke udah nyadi sebedau tu.
“Mayuh pekara ke ulih dipelajar nengah pengawa ngatur pekit drama iya nya ngangkatka pemerani bejaku ba mua orang mayuh, ngangkatka pengelandik ngena Jaku English sereta ke pemadu beguna ulih ngajar chara bejaku ke betul ngena Jaku English,” ku iya.
Manyin mansutka pekara nya lebuh bejaku ba pengawa nutup Sarawak English Drama Competition (SEDCOMP) 2018 ti diatur ba Balai Raya, Dewan Bahasa dan Pustaka, Kuching, ditu, kemari.
SEDCOMP 2018 diatur Fakulti Bahasa dan Komunikasi, Universiti Malaysia Sarawak ( UNIMAS) enggau kerejasama Opis Menteri Pelajar, Sains enggau Pemansik Teknologi sereta Opis Pelajar Nengeri Sarawak.
Dalam jaku pengelalu, Deputy vice Chancellor (Academic & International) UNIMAS Professor Dr. Fasihuddin Badruddin Ahmad ti ngarika Vice Chancellor UNIMAS Prof Datuk Dr Mohamad Kadim Suadi madahka, pekit nya dikena nyimpan tauka nyaga jaku enggau main asal ti majak punas di Sarawak.
“SEDCOMP 2018 inisiatif dikena nyediaka pelasar ngagai nembiak enggau pengajar ngelaku enggau mandangka pengelandik runding dalam kereja.
“Drama meri motivasi ngagai nembiak bakani ngena English sereta ngemanahka agi chara nyebut ke betul,” ku iya.
Pekit nya ti ngena tema ‘Jerita Lama Sarawak’ dibagi ngagai dua kategori iya nya sekula primari (tujuh buah sekula) enggau sekula sekondari (tujuh buah sekula), ke alai sekula ke bulih lumur satu ba dua kategori nya mai pulai perais Challenge Trophy, setipikit enggau perais duit RM1,200.
Lalu lumur dua, lumur tiga , Best Male Performer sereta Best Female Performer ungkup kededua kategori nya sama bela mai perais mata duit, tropi enggau setipikit.
SEDCOMP 2018 renggat sekula primary, lumur satu iya nya SJK Chung Hua No.1, lalu ditangkanka SJK Chung Hua No.2 (lumur) dua enggau lumur tiga iya nya SK Encik Buyong.
Renggat sekula sekondari, lumur satu SEDCOMP 2018 iya nya SMK Santubong, lalu ditangkan SMK Datuk Patinggi Haji Abdul Gapor (lumur dua) enggau leumur tiga SMK Bandar Semariang.