Enda mayuh rayat nengeri tu nemu pasal haribulan tu alai kitai berengkah merintah diri betuaika anak Sarawak empu taun 1963
MUKAH: Haribulan 22 Julai patut dikena enchelakka mata genap peranak Sarawak iya nya haribulan ke amat nengeri tu merdeka.
Enda mayuh orang nemu haribulan ke amat endur menua Sarawak merdeka iya nya maya kitai berengkah merintah diri betuaika peranak Sarawak empu maya taun 1963.
Sedar ke pekara nya, atur keterubah digaga ex-kepala menteri Sarawak niang Pehin Sri Adenan Satem tauka Tok Nan iya nya ngeletak haribulan nya nyadi pengerami besai ke patut diintu Sarawak.
Taja pia, kena 2017 maya penuduk Kepala Menteri dilempai ngagai orang baru pengudah penyulai Tok Nan, Datuk Patinggi Abang Johari Tun Openg nampung 22 Julai nyadi haribulan ke alai Sarawak kemisi tauka hari besai.
“Diatu semua udah nemu iya nya haribulan 22 Julai iya nya haribulan ke alai rayat Sarawak kala merintah diri lalu diarika semua bansa ny- entuk ke diatur,” ku iya ke mega Kaban Kunsil Nengeri (ADUN) Jemoreng Datuk Dr Juanda Jaya.
Kelimpah mulaika pengingat ngagai semua rayat Sarawak pasal pemesai reti haribulan nya kena 1963, iya mega nyadi kelai besai ngagai rayat nengeri tu terus beserakup ulih begulai nengah mayuh adat, bansa enggau pengarap.
Iya mega dipeda nyadi haribulan endur rayat Sarawak ngenegapka penyerakup enggau pengelantang sereta anang enda ingat nagih hak Sarawak ke udah lenyau baka ke udah disain dalam Sempekat 1963 (MA 63).
Ungkup ADUN Balingian Abdul Yakub Arbi, 22 Julai patut dikeingat nyadi siti haribulan pengeransing ngagai semya rayat Sarawak.
“Kitai enggai nyadi pambar lalu patut ngetanka hak nengeri tu,” ku iya.
Tambah mega pengarap ngagai perintah bepelasarka parti ari menua tu empu endang utai ke patut ditan dalam neruska agenda minta baru
Kitai enggai nyadi pambar lalu patut ngetanka hak nengeri tu. Abdul Yakub Arbi ADUN Balingian
hak ke udah lenyau.
Udah nya, ADUN Daro Safiee Ahmad minta ngambika penyayau ngagai nengeri tu dipandang sereta ngenegap agi pemanah kaul enggau semua bansa di nengeri tu.
“Semua kitai patut bediri tegap nyukung perintah ngambika sida enda mudah leju nagih hak ke udah diining rayat nengeri tu, pengandal ngagai pengulih rayat empu dalam ngemansang enggau ngatur menua mega beguna amat lalu patut diperansang genap anak kitai di nengeri,” ku Safie.