Kandang menua 3KP begunaka pemansang terus dipejalai ungkup pemaik peranak dia
BINTULU: Kandang menua Sungai Binyu, Sungai Seleju enggau Sungai Genaan ba pelilih Sebauh patut dilengkaska pengawa pemansang ti ngaul empat insfrastruktur pemun ke endang diguna semua peranak di kandang menua nya.
Chairman Serakup Gempung Komiti Pemansang Kandang Menua Binyu, Seleju enggau Genaan (3KP) Francis Jalak madah, komiti ti ngaul 19 buah rumah panjai dalam pelilih Sebauh nya minta ngambika perintah nengeri ngelengkaska pemansang di kandang Serakup 3KP ti nyengkaum pengawa ngaga jalai tar ke nuju ngagai 19 buah rumah panjai nengah jalai kebun dandang besai semanjai 37 kilometer (km) ari Jalai Ulu Sebauh.
Ku iya, kandang menua nya enda ngembuan perenga pengangkut lalu jalai bukai kelimpah ari jalai darat laban bot ekspres nadai beoperasyen agi kenyau ari lima taun ke udah.
Ku iya nerang, jalai kebun dandang besai ke endang udah bisi mega semina engkeman ungkup perengka pengangkut 4WD aja ti ngujungka mayuh peranak dia ngasaika baka ke enda dikibuh.
“Nyema nadai jalai alun ke manah peranak rumah panjai kandang menua tu deka napi penanggul nganjung ank ke sekula sekondari laban sekula ti dampih pan iya nya Sekula Sekondari (SMK) Sebauh,” ku iya dalam penerang ditu, kemari.
Kelimpah ari nya, per- anak mega napi pemar deka berubat ba sepital ke dampih iya nya Sepital Bintulu ke penyauh nya urung 95 km ari palan ke pemadu ujung di kandang menua nya, pemar deka ngulihka perengka pemun ninting hari ba Pasar Sebauh lalu pemar deka bejalaika pengidup sehari-hari kelebih agi ruang bilik ti mayuh agi ke kurang penatai pemisi.
Francis madah, perengka pemun ke bukai ti dipinta iya nya nyediaka bekal ai beresi ke diatu peranak rumah panjai nya di kandang menua nya semina ngarapka ai ujan ti ditimbun ke endang enda mayuh lalu ai sungai mega nadai beresi.
Ku iya, pengawa ngaga menara telekomunikasyen mega bela diguna lalu naka ke diatu semina bisi dua iti menara ke digaga dampih enggau kandang menua nya ke arus nya enca chukup mungkur dikena napi peminta semua kandang menua nya.
“Menara telekomunikasyen nya berat ungkup peranak di kandang menua tu kelebih agi dikena ngulihka berita kaban belayan ke diau jauh ari menua,” ku iya nambah.
Beserimbai enggau nya mega, pengawa nyambung kuasa karan ungkup mensia mayuh nyentukka diatu semina naka kandang endur Kelabat lalu peranak dalam kandang menua 3KP ngasaika enda ulih tebelika diesel ungkup guna jenerator enggau ungkus urung RM12 sampai RM15 semalam ba kandang menua sida.
Ku iya nandu, diatu lebih agi napi pemar dikena ngulihka bekal diesel laban nadai perengka pengangkut sereta gaya jalai ti kurang manah mega nyadi tegal nyengkaum gaya jenerator ti pedis deka diidupka kelebih agi ungkup orang lunggar umur sereta mega pedis deka diintu.
Nya alai, ku iya nyemetak madah, Serakup 3KP endang ngarap ngambika semua empat infrastruktur nya ulih dipejalai enggau naka pengelengkas sebedau taun 2021.
Ba kenang ke bukai, ba pengerami Ngiling Bidai kena 7 Julai tu tadi, Menteri Bekal Ai enggau Kuasa Karan Menua Pesisir ke mega Kaban Kunsil Nengeri (ADUN) Kemena Dato Stephen Rundi Utom nyamin lalu besemaya deka nyaup sida ngulihka semua empat infrastruktur nya kelebih agi bekal ai beresi lalu mega minta Serakup 3KP nyediaka keretas kereja ngambika piak sida ulih ngatur pekara nya enggau lengkas.
Dr Rundi mega meri agih belanja sepenyampau RM30,000 ngagai Serakup 3KP ke udah ditumbuhka kena 26 Mei taun tu lalu bejalaika aktiviti ti bekaul enggau pemansang di kandang menua sida.
SAma bisi datai iya nya Kaban Parlimen (MP) Bintulu Datuk Seri Tiong King SIng, Residen Bagi Menua Bintulu Jack AMan Luat, Pemesai Pelilih Sebauh William Manggoi, Menijer Kebun Dangang Besai DD Pelita, chairman Gerempung Tuai Rumah Pelilih Sebauh sereta kandang menua Serakup 3KP.