Projek ‘Herritage Trails and Tales’ YPS mujur dipenyadi ba Kuching
KUCHING: Tuai Pemegai Menua Tun Pehin Sri Abdul Taib Mahmud kemari bejadi projek ‘Herritage Trails and Tales’ Yayasan Perpaduan Sarawak (YPS) di Kuching.
Projek ke bekaul enggau pekara sejarah nya meratka pengawa mandang sereta bekunsi cherita penyerakup ke ayan di serata nengeri.
Herritage Trails and Tales nusui pengawa ke udah ditempa ti ngujungka Sarawak nyadi chuan penyerakup di menua tu.
Nengah projek tu, YPS nusuika cherita penegap kaul enggau semengat berakup peranak Sarawak ti diarika mayuh pupu bansa.
Aktiviti ke udah diperambu ungkup projek ba taun 2018 enggau 2019 nyengkaum mandangka cherita penyerakup nengah bup, video enggau chara ‘online’.
Ba pengawa kemari, Taib ke mega Chairman YPS (Board of Trustees), bisi nyuaka ‘CommUnity Inspirations’ iya nya setipikit basa ngagai sekeda gerempung ti udah nyaup ngelaku semengat berakup ba dalam komuniti di nengeri tu.
Ungkup saup ba Simposiun Main Asal Sarawak, YPS meri ‘ CommUnity Inspirations’ ngagai Gerempung Federation Orang Ulu Sarawak Malaysia (FORUM), Gerempung Dayak Bidayuh Menua ( DBNA), Dayak Cultural Foundation (DCF), Amanah Khairat Yayasan Budaya Melayu Sarawak, Gerempung Melanau Sarawak, Gerempung Federasyen Cina Sarawak enggau Gerempung India Sarawak.
Ungkup kerejasama ngemujur projek ‘Harmony Walk’, YPS meri ‘CommUnity Inspirations’ ngagai Gerempung Grija Sarawak, Palan Pemadah Islam Sarawak,Gerempung Buddha Sarawak, Kaunsil Nengeri Malaysia Hindu Sangam Sarawak,Gerempung Sikh Temple Sarawak sereta Gempuru Semengat Baha’is Sarawak.
CommUnity Inspirations mega diberi YPS ngagai Masjid An Naim enggau Gerija Good Shepherd, Miri.
YPS nyadi sebengkah organisasyen ti meratka atur nge- laku, ngangkat sereta nyendia sebarang aja program ke tau ngintu sereta ngenegap penyerakup enggau pengelantang peranak pupu bansa di Sarawak dalam Federasyen Malaysia.
Organisasyen matak raban nembiak Sarawak ba mayuh bengkah program ke tau ngangkatka pemereti meri basa ngagai orang bukai.
Pemereti nya mungkur mayuh bengkah pekara ngambika sida seruran ngasaika pengelantang nengah semengat berakup.