Sarawak begunaka penerang silik royalti minyak 20 peratus
KUCHING: Kepala Menteri Datuk Patinggi Abang Johari Tun Openg madahka Sarawak begunaka penerang silik ari Perintah Besai ti diiring Menteri Besai Tun Dr Mahathir Mohamad bekaul enggau royalti minyak 20 peratus ke diberi ngagai nengeri pemansut minyak enggau gis nyengkaum Sarawak.
Iya madahka pekara nya patut diterangka enggau dalam agi laban entara 20 peratus royalti enggau 20 peratus asil penguntung nya bisi bida.
“Sebedau tu aku kala mega nyebut lalu kitai deka ngulihka penerang silik dulu (ari Perintah Besai). Laban entara asil penguntung enggau royalti nya bisi bida,” ku iya nyaut enggau pandak lebuh dikerandau raban pengarang berita bekaul enggau pekara nya.
Dulu ari nya Abang Johari meri ucaptama ba Mesyuarat Jawatankuasa Majlis Tertinggi SABERKAS Sarawak Ke- 51 ba sebuah hotel ditu, kemari.
Abang Johari ditanya bekaul enggau penerang ke dipansutka Menteri Besai Tun Dr Mahathir Mohamad di Kuala Lumpur nerangka iya nya 20 peratus ti diberi iya nya royalti ari asil untung petroleum ti diulih ari nengeri pemansut nya empu.
Nengah aum pengarang berita nya Tun Mahathir madahka royalti iya nya ari asil penguntung. Nyema untung RM100 juta, reti iya RM20 juta nyadi royalti.
Royalti nya bepelasarka penguntung Petronas ba siti- siti endur. Nya alai nama ke gumpul ba Terengganu enda dibayar ngagai Sarawak enggau Sabah, ku iya.
Dulu ari nya Tun Mahathir maya ngulu aum parlimen madahka Perintah Besai dibaruh iring Pakatan Harapan ngamatka semaya meri 20 peratus untung minyak ngagai empat nengeri pemansut petroeleum menua tu.
Maya Pengawa Bepilih Besai Ke-14 nambahka penyampau royalti minyak nyadi 20 peratus ngagai nengeri pemansut petroleum baka Sarawak, Sabah, Kelantan enggau Terengganu, endang siti ari semaya dalam manifesto PH.