PDK Morsjaya ngarapka bisi begunan kediri nampung pemayuh pelatih sida
MIRI: Palan Pemulihan Dalam Komuniti ( PDK) Morsjaya andal deka bisi begunan kediri dalam pengawa deka nambahka pemayuh pelatih nembiak mit ‘ istimewa’ ditu.
Chairman palan nya Alah Imbang madahka tetiap taun PDK Morsjaya nerima rejister nembiak ‘ istimewa’ baru ke deka diberi pelajar kenyau ditumbuh ba taun 2014.
“Palan ti disiwa diatu iya nya kandang endur Bumiko, ukai semina enda ulih nampung penyampau sida ke diatu bisi 78 iku nembiak ‘istimewa’ ke udah berejister, pia mega pemesai palan nya mega enda besai dikena nyediaka perengkaguna latih lalu ketegal isu pengelikun, kitai endang begunaka sebuah begunan kediri empu ke lantang agi,” ku iya.
Ku Alah, nengah Miri Senadin Special Children Caring Association (MSSCCA) ke ditumbuhka dikena ngiga tanah ungkup projek begunana nya.
“Gerempungnyaudahnemu sebidang tanah ti dampih enggau Sepital Miri ti ngembuan pemesai tiga ikar udah diberi peminta ngagai Opis Tanah enggau Survei (JTS) ungkup proses ke bukai.
“Nyema dikemendar piak nya, nya deka diengkah ba nama PDK Morsjaya lalu deka dipejalai MSSCCA ngambi ngiga Patron ungkup ngemata sereta minta bantu ke projek nya ila.
“Pengawa tu nyadi pengarap ti besai ngagai kami lalu ngarapka nya ulih narit bala pengari rayat, ejensi ke bekaul, Gerempung Ukai Dikuasa Perintah ( NGO) sereta komuniti ke bukai dikena ngemujurka projek nya ungkup nembiak ‘ istimewa’ di Morsjaya tu ulih nerima servis enggau palan ke lantang agi jemah,” ku iya.
Alah madah munyi nya ba Program Hari Terbuka PDK Morsjaya ti dipejalai ba palan nya ditu kemari.
Program tu udah dipenyadi Kunsilor Yap Siew Jin ke nyadi pengari Menteri Muda Dagang Temuai, Seni enggau Main Asal Datuk Lee Kim Shin.
Sama bisi iya nya Penyelia PDK Morsjaya Magdalene Marcus, pengari pemesai Opis Pengintu Pengelantang Komuniti (JKM) Miri Awang Abdul Hamdi Awang Ibrahim sereta temuai ke bukai.
Dulu agi ari nya, ku Alah nerang, program ‘Hari Terbuka’ nya beserimbai enggau ngintu PDK Morsjaya kelimpah ari ngerapitka kaul raban komiti PDK Morsjaya, apai indai, pelatih, orang ti gawa sereta ejensi pengintu pengelantang ke bekaul.
“Kelimpah ari nya mega, program tu dikena meri penerang ngagai komuniti bekaul pemisi PDK sereta batang tuju enggau servis ke bisi dipejalai dia,” ku iya.
Program ‘ Hari Terbuka PDK Morsjaya’ nya mega dirichahka agi enggau mayuh aktiviti baka pekit nyura, beperesa pengerai enggau ngeli, kaunter servis JKM enggau Pelajar Khas, demonstrasyen nyumai enggau nyait, asil kereja pelatih PDK, pengawa mandang produk Inovasyen sereta nyabut tikit benasit.