S’wak bisi kuasa nentuka kuing diri

Petra Jaya deka nentuka kuing Sarawak lalu ukai Putra Jaya

KUCHING: Kepala Menteri Datuk Patinggi Abang Johari Tun Openg netapka Petra Jaya deka nentuka kuing Sarawak lalu ukai Putra Jaya.

Ku iya atur mindah kuasa ari Kolonial British ke digaga 55 taun nyata mandangka Sarawak bisi kuasa nentuka kuing diri.

“Putra Jaya ukai London. Atur mindah kuasa ari Kolonial British netapka Petra Jaya deka nentuka kuing Sarawak,”ku Abang Johari.

Iya mansutka jaku nya ba pengerami ngintu Hari Merdeka Sarawak 2018 ke diatur di Dataran Perayaan di Jalai Stadium Kuching ditu, kemari.

Pengerami nya dipenyadi Tuai Pemegai Menua(TYT) Tun Pehin Sri Abdul Mahmud ke disempulang bini iya, Toh Puan Datuk Patinggi Ragard Kurdi Taib.

Abang Johari ba pengerami nya mega madah Sarawak sigi enda deka ningkilka diri ari Federasyen Malaysia.

“Sekali agi aku madah ditu diak nadai kebuah Sarawak patut ningkilka diri ari Malaysia.

“Tang dalam Malaysia, ukai reti kitai enda ulih minta hak kitai ke udah disetuju dalam Sempekat Malaysia 1963(MA63) enggau konstitusyen,”ku Abang Johari.

Iya pechaya pengudah numbuhka gempung politik ngatika diri iya nya Gabungan Parti Sarawak (GPS), Sarawak bisi platfom ke manah sereta tegap.

GPS ku iya deka ngenatai pinta enggau peneka Sarawak enggau nadai besekat ungkup pemaik Sarawak.

Iya nambah Sarawak nyadi sebengkah ari Malaysia 55 taun ke udah enggau pengarap ulih nitihka singkang Malaya.

Ku iya, Malaya maya nya udah jauh mansang enti dibandingka enggau Sarawak lalu nya meh pekara ti dikedeka raban ketuai Sarawak ke dulu.

Maya nya mega ku Abang Johari nambah, Sarawak bisi irau sentang kuing Sarawak dalam Malaysia.

“Apai Jugah kala madah ‘Anang Malaysia baka tebu, manis di pun tabar di ujung’,” tandu Abang Johari.

Ngenang kaul ke sama, Abang Johari madah 22 Julai mai reti ke besai ngagai peranak Sarawak.

Iya ngarap atur meratka 22 Julai deka mai semua peranak nengeri tu begempung lalu nentuka Sarawak ulih bediri sama tinggi sereta duduk sama baruh enggau nengeri bukai ke udah maju.

“Kitai begempung ngenanka hak Sarawak ke udah nyadi seiti piak ti ngadaka Malaysia,’ku iya.

Bela datai Sapit kepala Menteri Datuk Amar Douglas Uggah enggau Datuk Amar Awang Tengah Ali Hassan, Menteri Pengatur Pengerami Datuk Dr. Sim Kui Huan sereta menteri bukai.

Putra Jaya ukai London. Atur mindah kuasa ari Kolonial British netapka Petra Jaya deka nentuka kuing Sarawak. Datuk Patinggi Abang Johari Tun Openg Kepala Menteri Sarawak