Gaji minimum RM1,500 semina didanji dalam timpuh 5 taun

ALOR SETAR: Perintah sigi bebendar deka ngamatka danji tikas gaji minimum baru ungkup sektor swasta manggai RM1,500 sebulan baka ke udah dipekat dalam manifesto Pakatan Harapan (PH) taja tu ukai danji ke patut dipejalai dalam timpuh 100 hari merintah.

Tang Sapit Menteri Penguasa Orang Gawa Datuk Mahfuz Omar madah danji nya deka dikeamat dalam timpuh lima taun PH merintah.

“Patut diterang ngagai rayat iya nya danji nya ukai ungkup timpuh 100 hari tang lima taun lalu maya abis penggal, baru kitai ulih berundingka chara bejalaika atur nya tang naka diatu tikas gaji minimum tu udah berengkah lalu deka dipansik baru genap dua taun,” ku iya madah ngagai pemberita di Kampung Padang Lalang ditu ensana.

Hari Empat tu tadi Menteri Penguasa Orang Gawa, M Kula Segaran ba Dewan Rakyat madah Kaunsil Pemikir Gaji Menua (MPGN) udah tembu bejalaika Pansik Baru Atur Gaji Minimum 2016 lalu usul pansik nya deka dibantai enda lama agi.

Berebak enggau nya, Mahfuz madah pengaji meseti meri bayar ngagai pengereja pengawa konterik enggau sementara ke gawa ba opis perintah ngagai Gerempung Pengelikun Rama (Perkeso).

“Mayuh pengereja pengawa konterik enggau sementara agi bedau dibayar engka laban enda nemu hak sida kelimpah takit madah ngagai piak Perkeso laban ti nangi kena buai pengaji kereja, kebendar tu beguna amat nyema nyadi penusah enda disadang maya sida gawa nyengkaum mungkur kes pemati.

“Pengereja pengawa mega enda patut dibuai pengaji gawa laban sida endang bisi hak madah tauka ngaga ripot ngagai Perkeso sentang hak sida.

“Aku deka madah sereta berandauka pekara tu enggau menteri ngambika semua pengaji ngaga bayar ungkup pengereja pengawa konterik sida serta staf sementara sida,” ku iya. — Bernama