Seruan betatika sekula lama ba menua pesisir baka ke udah disemaya perintah ke udah
MIRI: Kaban Parlimen (MP) Baram, Anyi Ngau kemari minta opis penguasa bejalaika tasat ke silik bekait enggau pun rumah/kuarters ke kena empa api lalu ngujungka seiku pengajar parai di SK Batu Bungan di Baram, kemari.
Anyi ke nyadi MP masuk dua penggal nya ke benung baum di Dewan Rakyat di Kuala Lumpur lebuh ditalipaun kemari, madahka penusah ke nyadi nya, enda dijangka.
“Aku lalu bedau nerima ripot penuh bekait enggau penusah nya kelebih agi pun api nya nyadi, tang dipelabaka bisi kaul enggau tali karan, lalu enti iya bansa nya, sigi udah maya iya ari suba Opis Menteri Pelajar ngaga projek nya, baka ke udah disemaya ulih Perintah ke udah,” ku iya.
Iya nandu baru madahka Perintah enda tau enda betatika sekula bansa tu kelebih agi ke ba menua pesisir, ke udah lama tauka jai, ngambika penusah bansa tu enda nyadi baru.
“Pemerat enda tau enda digaga ba semua sukut kelebih agi sentang pengelikun sekula, nembiak sereta bala pengajar,” ku iya.
Anyi mega ngenataika penyinu ati iya ngagai ruang bilik pengajar ke udah nadai nya, sereta meri jaku selamat ngagai dua iku pengajar ke diberita betu ke benung berubat ba sepital diatu.
“Aku enggau naka ulih deka mantu penusah tu,” ku iya.
Aku lalu bedau nerima ripot penuh bekait enggau penusah nya kelebih agi pun api nya nyadi, tang dipelabaka bisi kaul enggau tali karan, lalu enti iya bansa nya, sigi udah maya iya ari suba Opis Menteri Pelajar ngaga projek nya, baka ke udah disemaya ulih Perintah ke udah. Anyi Ngau MP Baram