Musin kemarau di Marudi engkeman enggau berikan kelebih agi di Tasik Logan Tujuh
MARUDI: Musin kemarau dalam kandang berapa minggu tu ke udah, Marudi entara sitak menua ke napi penyuntuk hari ujan, enti bisi pan enda ulih ngasuh ai sungai pasang, ke nyadi penanggul ba mensia mayuh ti diau di sitak nya, tang ukai ba sida ke berikan.
Enti nitih maya musin kemarau, sida ke berikan enda irau ati laban sigi nemu mayuh ikan baik nya sida iya berikan ba sungai mit tauka tasik tebilang endur berikan, Tasik Logan Tujuh.
Musin kemarau mega musin nambah pemisi ba sida ke rindu nyala tauka berikan laban sigi ditemu deka bulih mayuh ikan, ku Mat, seiku orang berikan ke baru pulai nyala di Tasik Logan Tujuh pagi kemari.
Lebuh datai di Marudi, ikan nya lalu disangkaika sereta dibai ngagai pasar Marudi, Marudi Town Square Garden, alai ikan nya dijual ngagai pengguna.
Pemisi ikan nya ukai semina di ulih sida ke berikan di Marudi aja, tang mayuh ikan mega dibai nurun tumu pagi ari Kuala Tutoh, Tinjar Basin enggau Batu Belah, Tutoh, dijual di Pasar Marudi.
Ba lansa bukai, Sungai Baram ke majak mabu maya kemarau tu meri penanggul ngagai sida ke mai sepris baka Gada ke seruran mai sepris, pulai mansang ari Marudi –Long Lama –Marudi.
Maya kemarau tu ku iya, ai mabu endar, alai pengawa mai sepris diketuka dulu seraya nganti gaya mua hari sereta ai sungai dipeda manah mimit.
Nambah enggau nya mega, gaya ai ke mabu endar di Long Terawan enggau Long Panai, ngujungka mensia mayuh milih ngena pengangkut darat nurun ke pasar Marudi tauka ke Bandaraya Miri.
Taja pia, baka sitak Poyut/ Lubok Nibong ke suah endar didinga madah nadai ai maya musin kemarau, enti bisi pan mimit aja, kediatu ai tangki sida iya agi bisi dikena ngaga pengawa di rumah, lalu bedau didinga minta saup ari Lembaga Air di sitak nya.
Sida ke diau di rumah panjai di sitak nya ka agi mai gilin sida iya nurun ke pasar Marudi ngambi ai ke ulih dikena sida iya di rumah.