Perintah nengeri seruran nyukung tanggungpengawa pengajar
BETONG: Perintah Sarawak deka meri sukung tegut ngagai kaul pengawa ngajar laban profession nya udah nyadi chukup mar ketegal ubah ekonomi rama.
Sapit Kepala Menteri Datuk Amar Douglas Embas madahka perintah Sarawak endang sedarka tatak enggau pemar ditapi bala pengajar Sarawak enggau naka ulih bejalaika pengawa memanah nentuka semua nembiak nadai ngira bansa teulihka pelajar menyana.
Uggah bejaku ba Pengerami Makai Lemai Aprisiasyen beserimbai enggau pengawa ngintu Hari Pengajar Sarawak di Dewan Tan Sri Kalong Ningkan ditu kena lemai Hari Dua.
Uggah, ke nyadi Menteri Betanam Betupi Moden, Tanah Adat enggau Pemansang Kandang Menua ngarapka pengelurus pengawa ngenang jasa ari perintah dikena ngelala bala pengajar ti nyulut ti meri sida semua ungkup bala nembiak deka nambahka agi pengering ngagai bala pengajar kitai.
Enda baka ke dulu suba, Uggah ngaku pengawa ngajar nembiak kemaya hari mayuh agi begunaka bala pengajar ti nempa bala anak ulih beretan idup napi pekara ti seruran berubah.
“Perintah Sarawak ngarap ulih ngaga rikod, meri terima kasih ngagai semua pengajar ti udah gawa di nengeri tub a pemanah pengawa sida ngajar bala nembiak kitai,” ku iya madah nyemetak.
“Sekali agi, aku meri jaku Selamat Hari Pengajar enggau terima kasih mayuh laban udah ngajar bala anak serata nengeri enggau pengelurus sereta pengepuh,” ku iya.
Berebak enggau pengera- mi nya, Uggah ngemendarka pemeri ari iya penyampau RM20,000, ari Kaban Kunsil Nengeri ( ADUN) Layar, Gerald Rentap Jabu meri RM15,000enggau ADUN Saribas Mohd Radzi Sitam meri RM10,000 ngagai bala pengatur.
Sama bisi datai ngulu pengerami makai lemai nya, bini Uggah, Datin Amar Doreen Mayang, Penyanding Penemu Sains Perintah, Datuk Patinggi Tan Sri Alfred Jabu Anak Numpang enggau bini iya Tan Sri EmpiangJabu, ADUN Layar Gerald Rentap Jabu.