Parti tu deka seruran gawa tegut begulai enggau perintah PH taja pan nyadi raban politik penyakal
SERIAN: Peranak Sarawak dipinta terus nyukung gempung parti megai perintah di nengeri tu ari baruh gempung ke baru ditumbuh iya nya Gabungan Parti Sarawak (GPS).
Menteri Pelajar, Sains enggau Pansik Teknologi Dato Sri Michael Manyin madah, GPS ti megai perintah nengeri deka gawa rat enggau perintah besai Pakatan Harapan taja pan nyadi raban politik penyakal.
Iya nyemetak madahka GPS, ti ditumbuh pengudah gempung parti megai perintah nengeri pansut ari Barisan Nasional, deka nampung pengawa ditegika sida ari baruh pegai Kepala Menteri Datuk Patinggi Abang Johari Tun Openg, ngambi pulai hak Sarawak baka ti udah ditetap ari baruh Sempekat Malaysia 1963 (MA63).
¡°Kitai diatu dalam penyakal, tang kitai penyakal ti bebakih,” ku iya rambau pengawa ngelancharka jematan bailey di Genturung Pendiau
Kitai diatu dalam penyakal, tang kitai penyakal ti bebakih. Dato Sri Michael Manyin Menteri Pelajar, Sains enggau Pansik Teknologi
Tebakang Melayu apin lama ke udah.
Manyin nyemetak madah antara inisiatif tumu perintah nengeri, berindik ari asil pemutus Pengawa Bepilih Besai Ke-14 (GE14), deka nanggung ungkus elawin ti deka dibayar ngagai semua ketuai raban bansa di nengeri tu.
Pemutus digaga pengudah surat tesau ti dikeluarka Opis Menteri Pemansang Menua Pesisir perintah besai ke alai bayar elawin enggau pekara bekaul bukai baka pengawa nyiri diatu ditangguh.
Berebak enggau nya, ku Manyin, Serian nyengkaum kandang menua di baruh sitak Tebedu ke alai iya nyadi pengari rayat dipilih, diatu semua disambung enggau jalai belakin sereta ngasaika bekal kuasa karan 24 jam.
Ku iya, pengawa diatu dipejalai dikena ngemanahka sambung bekal ai beresi ngagai semua genturung pendiau dia, ti ulih dipejalai pengudah projek Bekal Ai Menua Pesisir Mantung Merau beungkus RM141 juta tembu.
Sama bisi datai ngulu pengawa nya ADUN Bukit Semuja John Ilus, Sekretari Politik Kepala Menteri John David Nyauh, Sekretari Kaunsil Pelilih Serian Constantine Jonas sereta bala ketuai komuniti.
Jematan bailey RM300,000 ti udah dilanchar sehari nya nyediaka sambung kedua ngagai Genturung Pendiau Tebakang Melayu lalu semina ulih ditengah entukar mit aja.