20 buah sekula udah nyereta ‘Program Outreach Sains’ Sekula Menua Pesisir Ke-5
KUCHING: ‘Program Outreach Sains’ Sekula Menua Pesisir Ke-5 diatur enggau naka pemujur pengudah matak sepenyampau 20 buah sekula ti nyereta iya.
Program diatur Opis Sains Palan Pematih Pengajar Kampus Tun Abdul Razak (IPGKTAR) sekali tu udah diatur di Sekula Primari ( SK) St Dominic Pichin di Serian kena 12 Julai tu tadi.
Program tu diatur Opis Sains IPGKTAR enggau Yayasan Sarawak sereta pengawa kolaboratif antara Opis Sains IPGKTAR enggau sekula primari ti dipilih nyadi tuai pengatur iya nya SK St Dominic Pichin, Serian.
Program Outreach nya udah nerima timbal chukup manah ari 20 buah sekula ti dikangau.
Penyampau tu iya nya siti rikot diturai ari sukut penyampau sekula ti kala nyereta program outreach diatur Opis Sains IPGKTAR kenyau ari taun 2014.
Sepenyampau 60 pesereta dikangau datai ari nembiak Primari 5 udah ngulu aktiviti program Outreach seraya lebih kurang 270 iku pengajar enggau nembiak sekula udah bejalai meda pengawa mandangka sains.
Batang tuju Program Outreach Sains Manua Pesisir Taun 2018 iya nya nyediaka awak enggau peneleba belajar Sains chara ti ngasuh rindu di luar pengawa belajar dalam bilik kelas.
Kelimpah ari nya, tuju bukai dikena nerenakka ati rindu ngagai bala nembiak sekula primari menua pesisir ngagai sains.
Program Outreach Sains ti udah diatur nya nyediaka bemacham aktiviti baka pengawa mandangka sains ke alai bala nembiak diberi awak bekomunikasyen enggau chara ‘hands-on’ sereta ‘minds-on’ kelimpah meretika konsep sains ti bekaul.
Kelimpah ari nya, bala pesereta ti dikangau diberi awak ngulu dua aktiviti inovasyen iya nya “Landasan Inovasi” enggau “Saya Perkasa” ke alai sida diberi awak ngaga jalai enggau struktur bekenaka bahan dibuai.
Kededua akiviti nyadi aktiviti dipekit, tuju iya nguji pengelandik berunding tikas tinggi (KBAT), kreativiti, pemintar runding mutarka penanggul enggau semengat gawa dalam tim bala pesereta.
Ba aktiviti “Landasan Inovasi”, pemenang lumur satu dipenggi SK Tebedu, penuduk kedua dimenang SK Sejijag enggau penuduk ketiga pulai ngagai SK Gahat Mawang. Ba aktiviti “Saya Perkasa”, champion dipenggi SK Sg Sameran, lumur dua dimenang SK Tema enggau ketiga iya nya SK Parun Suan.
Isi program muakka lemai iya nya bengkel teknik nyaut tanya UPSR enggau penerang nya engkeman amat ungkup nembiak Primari 5 ti nyadi siti pengawa sida nyediaka diri tumu nyaut tanya nitihka UPSR.
Ba jaku bejadi nutup program nya, pengari Direktor IPGKTAR Dr Poon Cheng Yong meri peransang ngambika kerejasama enggau pengawa kolaboratif baka nya seruran dipejalai dudi hari.
Iya meri besai terima kasih ngagai semua sekula ti bisi ngaul diri, PPD Serian enggau raban pengatur pengawa SK St Dominic Pichin ba kerejasama enggau sukung ti diberi.
Iya mega meri terima kasih ngagai raban Yayasan Sarawak ti udah melanja ngemujurka Program Outreach Sekula Menua Pesisir 2018.